സിന്ധുമോള് ആര്
തിരുവനന്തപുരം: ഓണക്കാലത്ത് സംസ്ഥാനത്തുണ്ടായ തിരക്ക് കണക്കിലെടുത്ത് അടുത്ത രണ്ടാഴ്ച സംസ്ഥാനത്ത് കൊവിഡിന്റെ അതിശക്തമായ വ്യാപനമുണ്ടാകുമെന്ന് ആരോഗ്യമന്ത്രി കെകെ ശൈലജ. ചെറിയ രോഗലക്ഷണങ്ങളുണ്ടായാല് പോലും യാത്രകള് ഒഴിവാക്കാന് എല്ലാവരും ശ്രദ്ധിക്കണം. ഓണക്കാലത്ത് കടകളിലും മറ്റും പതിവില് കവിഞ്ഞ തിരക്കുണ്ടാവുകയും പലരും കുടുംബത്തില് ഒത്തുകൂടുകയും ചെയ്തതിനാല് രോഗം പകരാനുള്ള സാധ്യത കൂടുതലാണ്. വീട്ടില് ആര്ക്കെങ്കിലും ലക്ഷണമുണ്ടെങ്കില് എല്ലാവരും മാസ്ക് ധരിക്കണമെന്നും മന്ത്രി വ്യക്തമാക്കി.
അണ്ലോക്ക് നാലാം ഘട്ടം വന്നതോടെ പല മേഖലകളിലും ഇളവ് പ്രഖ്യാപിച്ചിട്ടുണ്ട്. വിദ്യാഭ്യാസ സ്ഥാപനങ്ങള്, സിനിമാ തിയേറ്ററുകള് തുടങ്ങിയവ ഒഴികെയുള്ളവയുടെ നിയന്ത്രണങ്ങള് നീക്കുമ്പോള് ജനങ്ങള് സാധാരണ ജീവിതത്തിലേക്ക് മടങ്ങുകയാണ്. രോഗം പിടിപെടാന് ഒരു ചെറിയ അശ്രദ്ധ മാത്രം മതി. നമ്മുടെ ആരോഗ്യം നമ്മുടെ ഉത്തരവാദിത്തമാണെന്നത് ആരും മറക്കരുതെന്നും കെ.കെ ശൈലജ പറയുന്നു.