![“Manju”](https://santhigirinews.org/wp-content/uploads/2020/04/YOUTUBE.jpg")
തിരുവനന്തപുരം :കേരളം രാജ്യത്തെതന്നെ ഏറ്റവും മികച്ച നിക്ഷേപ സൗഹൃദ സംസ്ഥാനങ്ങളിലൊന്നാണെന്ന് മുഖ്യമന്ത്രി പിണറായി വിജയന്‍. ആ‍ര്‍.പിജി ഗ്രൂപ്പ് ചെയര്‍മാനും വ്യവസായിയുമായ ഹര്ഷ് ഗോയെങ്കയുടെ പ്രശംസ ട്വീറ്റിന് മറുപടിയായാണ് മുഖ്യമന്ത്രിയുടെ ട്വീറ്റ്.
എല്‍ഡിഎഫ് സര്‍ക്കാര്‍ നിക്ഷേപ/വ്യവസായ സൗഹൃദ നയം തുടരുമെന്നും, വ്യവസായ സംരംഭങ്ങളുടെ സുസ്ഥിരമായ നിലനില്‍പ്പ് ഉറപ്പാക്കുമെന്നും മുഖ്യമന്ത്രി ഗോയെങ്കയ്ക്ക് റീട്വീറ്റ് ചെയ്തുകൊണ്ട് പറഞ്ഞു. കേരളത്തിലെ ഏറ്റവും വലിയ തൊഴില്‍ദാതാക്കള്‍ തങ്ങളാണെന്നും സര്‍ക്കാറില്‍ നിന്ന് നല്ല പിന്തുണയാണ് ലഭിക്കുന്നതെന്നുമാണ് വ്യവയായി ഹര്ഷ് ഗോയെങ്ക ട്വീറ്റ് ചെയ്തത്.
വ്യാവസായിക മുതല്‍മുടക്കിന് കേരളം അനുകൂലമല്ല എന്ന് പ്രചരിപ്പിക്കാന്‍ സംഘ് പരിവാര്‍ / ട്വന്‍റി ട്വന്‍റി അണികള്‍ വ്യാപകമായി ശ്രമിക്കുന്നതിനിടെയാണ് കേരളത്തില്‍ ഏറ്റവും കൂടുതല്‍ നിക്ഷേപം നടത്തിയിട്ടുള്ള വ്യവസായി ഹര്ഷ് ഗോയെങ്ക തന്നെ വാദങ്ങള്‍ക്ക് മറുപടി നല്‍കിയത്. സാമ്പത്തിക വിദഗ്ധ ഷാമിക രവിയ്ക്കാണ് ഗോയെങ്ക ട്വിറ്ററില്‍ മറുപടി നല്‍കിയത്.
കിഴക്കമ്പലത്തെ കിറ്റെക്സ് ഗ്രൂപ്പ് കേരളത്തിലെ വ്യവസായ പദ്ധതി ഉപേക്ഷിക്കാന്‍ പോകുന്നുവെന്നും അതിന് കാരണം സിപിഐ എം നേതൃത്വം നല്കുന്ന സര്‍ക്കാരിന്റെ പീഡനം മൂലമാണെന്നും ആരോപിച്ചുകൊണ്ടുള്ള സ്വരാജ്യ മാഗസീനിന്റെ ലേഖനം ഷാമിക റീട്വീറ്റ് ചെയ്തിരുന്നു. ഇതിന് മറുപടി നല്കുകയായിരുന്നു ഹര്ഷ് ഗോയെങ്ക.
