കണ്ണൂര്: കണ്ണൂരിലെ മുഴക്കുന്ന് പഞ്ചായത്തില് പോളിങ് ബൂത്തിന് സമീപത്തുനിന്ന് ആറു ബോംബുകള് കണ്ടെത്തി. നെല്യാട്, വട്ടപ്പോയില് മേഖലകളിലാണ് ബോംബ് കണ്ടെത്തിയത്.
ബാഗിലും ബക്കറ്റിലും സൂക്ഷിച്ചിരുന്ന ബോംബുകള് പൊലീസ് നടത്തിയ പരിശോധനയില് കണ്ടെത്തുകയായിരുന്നു. ജില്ല പൊലീസ് മേധാവി യതീഷ് ചന്ദ്ര സംഭവസ്ഥലത്തേക്ക് തിരിച്ചു.
നാലു ജില്ലകളിലെ പോളിങ്ങിനിടെ ചിലയിടങ്ങളില് നേരിയ സംഘര്ഷങ്ങളുണ്ടായി. നാദാപുരം കീയൂരില് സംഘര്ഷമുണ്ടാക്കിയവരെ പിരിച്ചുവിടാന് പൊലീസ് ലാത്തിവീശിയിരുന്നു.
മലപ്പുറം പെരുമ്ബടപ്പ് കോടത്തൂരില് എല്.ഡി.എഫ് -യു.ഡി.എഫ് പ്രവര്ത്തകര് തമ്മില് സംഘര്ഷമുണ്ടായി. പോളിങ് ബൂത്തിന് മുന്നിലുണ്ടായ സംഘര്ഷത്തെ തുടര്ന്ന് പൊലീസ് ലാത്തിവീശി. യു.ഡി.എഫ് സ്ഥാനാര്ഥി സുഹറ അഹമ്മദിന് പരിക്കേറ്റു. ഓപ്പണ് വോട്ട് ചെയ്യുന്നതുമായി ബന്ധപ്പെട്ട തര്ക്കമാണ് സംഘര്ഷത്തില് കലാശിച്ചത്.