കഴക്കൂട്ടത്ത് അമ്മയെയും മക്കളെയും അയല്‍ക്കാര്‍ താമസ സ്ഥലത്ത് നിന്ന് ഇറക്കിവിട്ടു

സിന്ധുമോൾ. ആർ

തിരുവനന്തപുരം : കഴക്കൂട്ടത്ത് അമ്മയെയും മക്കളെയും താമസസ്ഥലത്ത് നിന്ന് ഇറക്കിവിട്ടു. പുറംപോക്കില്‍ ഷെഡ് കെട്ടി താമസിച്ചിരുന്ന യുവതിയെയും മക്കളെയുമാണ് അയല്‍ക്കാര്‍ ഇറക്കിവിട്ടത്. ഡിസംബര്‍ 17നായിരുന്നു സംഭവം നടന്നത്. പുറത്താക്കിയശേഷം ഇവര്‍ താമസിച്ചിരുന്ന ഷെഡും അയല്‍ക്കാര്‍ പൊളിച്ചുകളയുകയും ചെയ്‌തു.

കഴക്കൂട്ടം സൈനിക് നഗറിലാണ് അമ്മയ്‌ക്കും മക്കള്‍ക്കും ഇത്തരം ദുരനുഭവമുണ്ടായത്. വീട്ടമ്മയായ സുറുമിയും അവരുടെ പ്രായപൂര്‍ത്തിയാകാത്ത മൂന്ന് മക്കളും പുറമ്പോക്കില്‍ ഷെഡ് കെട്ടിയാണ് താമസിച്ചിരുന്നത്. ഇവിടെ ആയുധങ്ങളുമായെത്തിയ അയല്‍ക്കാര്‍ ഇവരെ വീട്ടില്‍ നിന്നും പുറത്താക്കി വീട് പൊളിച്ചുകളയുകയായിരുന്നു.

അതേസമയം പൊലീസില്‍ പരാതി നല്‍കിയെങ്കിലും അവര്‍ പരാതി കാര്യമായെടുത്തില്ലെന്ന് സുറുമി പറയുന്നു. തന്റെ ദേഹത്ത് കയറി പിടിച്ചെന്നും തങ്ങളെ ഭീഷണിപ്പെടുത്തിയെന്നും മനസാക്ഷിയില്ലാതെ ഇത്തരത്തില്‍ പ്രവര്‍ത്തിച്ചവര്‍ക്കെതിരെ നടപടി വേണമെന്നും ആവശ്യപ്പെട്ട് വീട്ടമ്മ വീണ്ടും പൊലീസിനെ സമീപിക്കാനൊരുങ്ങുകയാണ്.