ഓണ്‍ലൈന്‍ റമ്മിയില്‍ പണം നഷ്ടമായി; യുവാവ് ആത്മഹത്യ ചെയ്തു

സിന്ധുമോൾ. ആർ

തിരുവനന്തപുരം: ഓണ്‍ലൈന്‍ റമ്മിയില്‍ പണം നഷ്ടമായ യുവാവ് ആത്മഹത്യ ചെയ്തു. തിരുവനന്തപുരം കുറ്റിച്ചല്‍ സ്വദേശി വിനീത് ആണ് മരിച്ചത്. 28 വയസ്സായിരുന്നു. ഇയാള്‍ ഐ എസ് ആര്‍ ഓ യിലെ കരാര്‍ ജീവനക്കാരനാണ്.

ഡിസംബര്‍ 31-ാം തീയതിയാണ് വിനീതിനെ വീടിന് സമീപത്ത് തൂങ്ങി മരിച്ച നിലയില്‍ കണ്ടെത്തിയത്. കഴിഞ്ഞ ഒരു വര്‍ഷമായി വിനീത് പതിവായി ഓണ്‍ലൈന്‍ റമ്മി കളിക്കാറുണ്ടായിരുന്നു. ലോക്ക്ഡൗണ്‍ സമയത്ത് വലിയ തുകയ്ക്കാണ് റമ്മി കളിച്ചത്. തുടര്‍ന്ന് 12 ലക്ഷത്തോളം രൂപയുടെ കടബാധ്യതയുണ്ടായി. ഈ ബാധ്യത ബന്ധുക്കളും സുഹൃത്തുക്കളും ചേര്‍ന്ന് തീര്‍ത്തെങ്കിലും വിനീത് വീണ്ടും ഓണ്‍ലൈന്‍ റമ്മി കളി തുടരുകയായിരുന്നു. നിലവില്‍ 20 ലക്ഷത്തോളം രൂപയുടെ കടബാധ്യത വിനീതിനുണ്ടെന്നാണ് ബന്ധുക്കള്‍ പറയുന്നത്. നേരത്തെ സാമ്പത്തികബാധ്യത രൂക്ഷമായതോടെ വീട് വിട്ടിറങ്ങിയ യുവാവിനെ പൊലീസ് കണ്ടെത്തി തിരികെ എത്തിച്ചിരുന്നു.