കൊറോണ വാക്‌സിൻ ഫലപ്രാപ്തി കൈവരിക്കാൻ പ്രാർത്ഥിക്കുന്നു; ഫാറൂഖ് അബ്ദുള്ള

കശ്മീരിൽ 4ജി സേവനം പുന:സ്ഥാപിക്കണമെന്നും അദ്ദേഹം ആവശ്യപ്പെട്ടു.

ശ്രീനഗർ : കൊറോണ വാക്‌സിൻ ഫലപ്രാപ്തി കൈവരിക്കാൻ പ്രാർത്ഥിക്കുന്നുവെന്ന് ജമ്മു കശ്മീർ നാഷണൽ കോൺഫറൻസ് നേതാവ് ഫാറൂഖ് അബ്ദുള്ള. വികസനത്തിനായി എല്ലാവരും സൗഹാർദ്ദം കാത്തു സൂക്ഷിക്കണമെന്നും ഫാറൂഖ് അബ്ദുള്ള പറഞ്ഞു.

ആർട്ടിക്കിൽ 370 റദ്ദാക്കുന്നതിന് മുന്നോടിയായി റദ്ദാക്കിയ 4ജി ഇന്റർനെറ്റ് സേവനം പുന:സ്ഥാപിക്കണമെന്നും ഫാറൂഖ് അബ്ദുള്ള പ്രധാനമന്ത്രിയോട് ആവശ്യപ്പെട്ടു. വിവിധ പ്രശ്‌നങ്ങൾ ചൂണ്ടിക്കാട്ടിയായിരുന്നു ഇന്റർനെറ്റ് സേവനം പുന:സ്ഥാപിക്കുന്നതിനായുള്ള ആവശ്യം ഫാറൂഖ് അബ്ദുള്ള ഉന്നയിച്ചത്. വീടുകളിൽ ഇരുന്ന് പഠിക്കുന്ന വിദ്യാർത്ഥികളും സംരംഭകരും പഠനത്തിനും വ്യാപാരത്തിനും പൂർണ്ണമായി ആശ്രയിക്കുന്നത് ഇന്റർനെറ്റ് സേവനങ്ങളെയാണ്. അതിനാൽ എത്രയും വേഗം 4 ജി ഇന്റർനെറ്റ് സേവനം പുന:സ്ഥാപിക്കണമെന്നും ഫാറൂഖ് അബ്ദുള്ള കൂട്ടിച്ചേർത്തു.

ഗുജാർ ദേശ് ചാരിറ്റബിൾ ട്രസ്റ്റ് സംഘടിപ്പിച്ച പുസ്തക പ്രകാശന ചടങ്ങിൽ സംസാരിക്കുകയായിരുന്നു അദ്ദേഹം.