ദോഹ: ജനുവരി 27 മുതല് ഖത്തര് എയര്വേസ് യു.എ.ഇയിലേക്കുള്ള വിമാനങ്ങള് പുനരാരംഭിക്കും. ഖത്തര് ഉപരോധം അവസാനിപ്പിച്ച് ജി.സി.സി ഉച്ചകോടിയില് അല് ഉല കരാര് ഒപ്പുവെച്ചതോടെയാണിത്. മൂന്നരവര്ഷെത്ത ഉപരോധത്തിന് ശേഷം ഇതാദ്യമായാണ് ദുബൈയിലേക്കും അബൂദബിയിലേക്കും നേരിട്ട് ഖത്തര് എയര്വേസ് വിമാനസര്വിസ് തുടങ്ങുന്നത്. 27ന് ദുബൈ അന്താരാഷ്ട്രവിമാനത്താവളത്തിലേക്കും 28ന് അബൂദബി വിമാനത്താവളത്തിലേക്കുമാണ് വിമാനം പറക്കുക. ഇരു സര്വിസിനുമുള്ള ബുക്കിങ് കമ്ബനി വെബ്സൈറ്റില് തുടങ്ങിയിട്ടുണ്ട്.
27ന് ദോഹ ഹമദ് വിമാനത്താവളത്തില്നിന്ന് ഖത്തര് സമയം വൈകീട്ട് ഏഴിന് പുറപ്പെടുന്ന വിമാനം യു.എ.ഇ സമയം രാത്രി 9.10ന് ദുബൈയില് എത്തും. ഒരുമണിക്കൂറും 10 മിനിറ്റുമായിരിക്കും യാത്രാസമയം. 28ന് വൈകീട്ട് 7.50ന് ദോഹയില്നിന്ന് പുറപ്പെടുന്ന വിമാനം യു.എ.ഇ സമയം രാത്രി 9.55ന് അബൂദബി വിമാനത്താവളത്തില് ഇറങ്ങും. ഒരു മണിക്കൂറും അഞ്ചു മിനിറ്റുമായിരിക്കും യാത്രാസമയം.
ഖത്തറില്നിന്ന് സൗദിയിലേക്കും തിരിച്ചുമുള്ള സര്വിസുകള് കഴിഞ്ഞദിവസം തന്നെ തുടങ്ങിയിട്ടുണ്ട്. അതിനിടെ, ഇതിഹാദ് എയര്വേസ് തങ്ങളുടെ ദോഹ സര്വിസുകള് ഫെബ്രുവരി അഞ്ചുമുതല് പുനരാരംഭിക്കുമെന്ന് അറിയിച്ചിട്ടുണ്ട്. അബൂദബിയില്നിന്ന് ദോഹയിലേക്ക് ദിവസേനയുള്ള സര്വിസാണ് നടത്തുകയെന്ന് ഇത്തിഹാദ് ഗ്ലോബല് സെയില്സ് ആന്ഡ് കാര്ഗോ സീനിയര് വൈസ്പ്രസിഡന്റ് മാര്ട്ടിന് ഡ്ര്യൂ പറഞ്ഞു. സൗദിയിലേക്കും ഖത്തറിലേക്കുമുള്ള വിമാനസര്വിസുകള് ഇതിനകം പുനരാരംഭിച്ചിട്ടുമുണ്ട്.