തിരുവനന്തപുരം: പിഎസ്സി നിയമനം സുതാര്യമെന്നും ഒഴിവുകള് നികത്തുന്നതിലെ അപാകത നീക്കുമെന്നും മുഖ്യന്ത്രി പിണറായി വിജയന്. സംസ്ഥാനത്ത് നിലവിലുള്ള രീതി അനുസരിച്ച് സാധാരണ വരുന്ന ഒഴിവിന്റെ അഞ്ചിരട്ടി കണക്കാക്കിയാണ് പിഎസ്സി റാങ്ക് ലിസ്റ്റ് തയാറാക്കുന്നത്. ഇതുവഴി ലിസ്റ്റിലുള്ള എണ്പത് ശതമാനം പേര്ക്കും നിയമനം കിട്ടാത്ത സാഹചര്യം ഉണ്ടാകുമെന്ന് മുഖ്യമന്ത്രി വാര്ത്താസമ്മേളനത്തില് പറഞ്ഞു.
ഒഴിവുകള് കൃത്യമായി റിപ്പോര്ട്ട് ചെയ്യുക എന്ന് മാത്രമാണ് ഇക്കാര്യത്തില് സര്ക്കാരിന് ചെയ്യാനുള്ളത്. പിഎസ്സിക്ക് ഒഴിവുകള് കൃത്യമായി റിപ്പോര്ട്ട് ചെയ്യുന്നതില് വീഴ്ച വരുത്തുന്ന നിയമനാധികാരികള്ക്ക് എതിരെ കര്ശന നടപടികള് സ്വീകരിക്കാന് മന്ത്രിസഭായോഗം തീരുമാനിച്ചു. ഒഴിവുകള് റിപ്പോര്ട്ട് ചെയ്യുന്നുണ്ട് എന്ന് ഉറപ്പുവരുത്താന് ചീഫ് സെക്രട്ടറിയും ഉദ്യോഗസ്ഥ ഭരണ പരിഷ്കാര വകുപ്പ് അഡീഷനല് ചീഫ് സെക്രട്ടറിയും ഉള്പ്പെടുന്ന കമ്മിറ്റി രൂപീകരിക്കും. ഒഴിവുകള് റിപ്പോര്ട്ട് ചെയ്യുന്നതിലുള്ള തടസ്സങ്ങള് ഒഴിവാക്കുന്നതിന് നടപടികള് സ്വീകരിക്കാനും തീരുമാനിച്ചു. സീനിയോറിറ്റി തര്ക്കം കോടതി മുന്പാകെ നിലനില്ക്കുകയും കോടതി റഗുലര് പ്രമോഷന് സ്റ്റേ ചെയ്തുകൊണ്ട് ഇടക്കാല ഉത്തരവ് നല്കിയതുമായ കേസുകളില് മാത്രം താല്ക്കാലിക പ്രമോഷന് നടത്തി അതിന്റെ ഫലമായി വരുന്ന ഒഴിവുകള് പിഎസ്സിക്ക് റിപ്പോര്ട്ട് ചെയ്യാന് വകുപ്പധ്യക്ഷന്മാര്ക്ക് നിര്ദ്ദേശം നല്കും. പ്രമോഷന് അര്ഹതയുള്ള ഉദ്യോഗസ്ഥര് ഇല്ലാത്തതിനാല് പ്രമോഷന് നടക്കാത്ത സാഹചര്യം ചില വകുപ്പുകളിലുണ്ട്.
ഇത്തരം പ്രമോഷന് തസ്തികകള് പിഎസ്സി ലിസ്റ്റ് നിലവിലുള്ള കേഡറിലേക്ക് താല്ക്കാലികമായി തരംതാഴ്ത്തി ഒഴിവുകള് പിഎസ്സിക്ക് റിപ്പോര്ട്ട് ചെയ്യാന് വകുപ്പധ്യക്ഷന്മാര്ക്ക് നിര്ദ്ദേശം നല്കും. അര്ഹതയുള്ള ഉദ്യോഗസ്ഥര് ലഭ്യമാകുന്ന മുറയ്ക്ക് താല്ക്കാലികമായി ഡീ–കേഡര് ചെയ്ത നടപടി ഭേദഗതി ചെയ്യും. ഈ നടപടികള് പത്തു ദിവസത്തിനകം മുന്ഗണനാക്രമത്തില് നടപ്പാക്കുന്നതിന് മേല്നോട്ടം വഹിക്കാന് ചീഫ് സെക്രട്ടറിയെയും ധനകാര്യ അഡീഷനല് ചീഫ് സെക്രട്ടറി, ഉദ്യോഗസ്ഥ ഭരണപരിഷ്കാര വകുപ്പ് അഡീഷനല് ചീഫ് സെക്രട്ടറി എന്നിവരെയും ചുമതലപ്പെടുത്താന് തീരുമാനിച്ചു. താല്കാലിക നിയമനം നടത്തുന്നത് വഴി പിഎസ്സി ലിസ്റ്റിലുള്ളവരുടെ അവസരം ഇല്ലാതാകുമെന്ന പ്രചാരണം ശരിയല്ല. പത്ത് വര്ഷത്തോളമായി താല്കാലിക തസ്തികയില് ജോലി ചെയ്യുന്നവര്ക്കാണ് നിയമന അംഗീകാരം നല്കുന്നത്. പത്ത് വര്ഷം എന്ന് പറയുമ്പോള് തന്നെ ഇക്കാര്യത്തില് രാഷ്ട്രീയ പരിഗണന ഇല്ലെന്ന് അറിയാമല്ലോ എന്നും മുഖ്യമന്ത്രി പറഞ്ഞു. 20 വര്ഷമായി താല്കാലിക ജോലി ചെയ്യുന്നവര് പോലും പട്ടികയിലുണ്ടെന്നും മുഖ്യമന്ത്രി പറഞ്ഞു.
ഫെബ്രുവരിയില് അവസാനിക്കുന്ന പിഎസ്സി ലിസ്റ്റുകളുടെ എല്ലാം കാലാവധി ആറ് മാസത്തേക്ക് കൂടി നീട്ടി. ഏപ്രില്, മെയ് മാസങ്ങളില് വരുന്ന ഒഴിവുകളില് കൂടി അവസരം ലഭിക്കും. 47,000 തസ്തികകള് സര്ക്കാര് സൃഷ്ടിച്ചു. ഇടതു സര്ക്കാര് അധികാരത്തില് എത്തിയ ശേഷം മാത്രം 1,57,911 പേര്ക്ക് നിയമനം നല്കി. 4012 റാങ്ക് ലിസ്റ്റുകള് പ്രസിദ്ധീകരിച്ചു. കഴിഞ്ഞ സര്ക്കാരിന്റെ കാലത്ത് 3113 മാത്രം ആണെന്നും മുഖ്യമന്ത്രി കൂട്ടിച്ചേര്ത്തു.