![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: രാജ്യത്ത് പക്ഷിപ്പനി മനുഷ്യരില്‍ സ്ഥിരീകരിച്ചുള്ള മരണവാര്‍ത്ത പുറത്ത് വന്നതിന് പിന്നാലെ വലിയ ആശങ്കയിലാണ് ജനങ്ങള്‍. അതെ സമയം ഇക്കാര്യത്തില്‍ ആശ്വാസ വാര്‍ത്തയുമായി രംഗത്തെത്തിയിരിക്കുകയാണ് ഐ.സി.എം.ആര്‍.
വളരെ അപൂര്‍വമായി മാത്രമേ പക്ഷിപ്പനി മനുഷ്യനില്‍ നിന്ന് മനുഷ്യനിലേക്ക് പടരുവെന്ന് ഐ.സി.എം.ആര്‍ മേധാവി രണ്‍ദീപ് ഗുലേറിയ ചൂണ്ടിക്കാട്ടി . എങ്കിലും രോഗം ബാധിച്ച്‌ മരിച്ച കുട്ടിയുമായി ബന്ധപ്പെട്ടവരെ കണ്ടെത്തും. കോഴിഫാമുകളില്‍ കോഴികള്‍ കൂട്ടത്തോടെ ചത്തിട്ടുണ്ടോയെന്നും പരിശോധിക്കുമെന്നും എയിംസ് ഡയറക്ടര്‍ അറിയിച്ചു .
പക്ഷികളില്‍ നിന്ന് മനുഷ്യരിലേക്ക് രോഗം പടരുന്ന സംഭവം അപൂര്‍വമാണ്. മനുഷ്യനില്‍ നിന്നും മനുഷ്യനിലേക്ക് രോഗം വ്യാപകമായി പടര്‍ന്ന സംഭവം ഇതുവരെ റിപ്പോര്‍ട്ട് ചെയ്തിട്ടില്ല. ചില ഫാമിലി ക്ലസ്റ്ററുകളില്‍ രോഗം പടര്‍ന്നതായി റിപ്പോര്‍ട്ടുകളുണ്ട്. എന്നാല്‍ ചെറിയ സമ്പര്‍ക്കം കൊണ്ട് രോഗം ഒരിക്കലും പടരില്ലെന്ന് എയിംസിലെ ഡോക്ടറായ ഡോ.നീരജ് നിഷാല്‍ സ്ഥിരീകരിച്ചു . മരിച്ച കുട്ടിയുമായി ബന്ധം പുലര്‍ത്തിയ ആര്‍ക്കും രോഗലക്ഷണങ്ങളില്ലെന്നും ആരോഗ്യപ്രവര്‍ത്തകരും സുരക്ഷിതരാണെന്നും അദ്ദേഹം കൂട്ടിച്ചേര്‍ത്തു.
അതെ സമയം ഭക്ഷ്യവിഭവങ്ങള്‍ ശരിയായ രീതിയില്‍ പാചകം ചെയ്ത കഴിക്കുന്നത് കൊണ്ട് കുഴപ്പമില്ല. ഉയര്‍ന്ന താപനിലയില്‍ ഭക്ഷണം പാചകം ചെയ്യുന്നത് വൈറസ് സാധ്യത ഇല്ലാതാക്കുമെന്നും എയിംസ് അധികൃതര്‍ അറിയിച്ചു.
പക്ഷിപ്പനി ബാധിച്ച്‌ മരണം സംഭവിക്കാനുള്ള സാധ്യത 60 ശതമാനത്തോളമാണ്. 70 ഡിഗ്രി സെല്‍ഷ്യസില്‍ 30 മിനിറ്റ് നേരം ഭക്ഷ്യവസ്തുക്കള്‍ പാചകം ചെയ്താല്‍ പക്ഷിപ്പനിക്ക് കാരണമാവുന്ന വൈറസിനെ നശിപ്പിക്കാനാകുമെന്നും ലോകാരോഗ്യ സംഘടനയും വ്യക്തമാക്കിയിട്ടുണ്ട്.
