കർഷകർക്ക് 20,000 കോടി രൂപ കൈമാറി പ്രധാനമന്ത്രി
ന്യൂഡൽഹി : പ്രധാൻ മന്ത്രി കിസാൻ സമ്മാൻ നിധി പദ്ധതിയുടെ എട്ടാമത്തെ ഗഡു രാജ്യത്തെ കർഷകർക്കായി പ്രധാനമന്ത്രി നരേന്ദ്ര മോദി കൈമാറി. രാജ്യത്തെ 9.5 കോടി കർഷകർക്കായി 20,000 കോടി രൂപയാണ് കേന്ദ്ര സർക്കാർ ഇന്ന് വിതരണം ചെയ്തത്. പദ്ധതിയുടെ എട്ടാം ഗഡുവും 2021-22 സാമ്പത്തിക വർഷത്തിലെ ആദ്യത്തെ ഗഡുവുമാണിത്. തുക വിതരണം ഉദ്ഘാടനം ചെയ്ത ശേഷം പ്രധാനമന്ത്രി കർഷകരമായി ആശയവിനിമയം നടത്തി.
പിഎം കിസാൻ പദ്ധതി പ്രകാരം അർഹരായ ഗുണഭോക്തൃ കർഷക കുടുംബങ്ങൾക്ക് പ്രതിവർഷം 6000 രൂപയുടെ വീതം സാമ്പത്തിക ആനുകൂല്യമാണ് ലഭ്യമാകുന്നത്. 2000 രൂപയുടെ മൂന്ന് ഗഡുക്കളായിട്ടാണ് നൽകുക. ഈ പദ്ധതിയിൽ ഇതുവരെ 1.15 ലക്ഷം കോടിയിലധികം രൂപയുടെ ആനുകൂല്യങ്ങൾ കർഷക കുടുംബങ്ങൾക്ക് കൈമാറിയിട്ടുണ്ട്. പല സംസ്ഥാനങ്ങളിലും കൊറോണ വ്യാപനത്തിന്റെ പശ്ചാത്തലത്തിൽ പ്രാദേശിക ലോക്ഡൗൺ പ്രഖ്യാപിച്ചിരിക്കെ സർക്കാർ നടപടി കർഷകർക്ക് ആശ്വാസമാകും.