ന്യൂഡല്ഹി: രാജ്യത്ത് 12 സംസ്ഥാനങ്ങളിലായി 56 കോവിഡ് ഡെല്റ്റ പ്ലസ് കേസുകള് റിപ്പോര്ട്ട് ചെയ്തതായി കേന്ദ്ര ആരോഗ്യ മന്ത്രാലയം . കോവിഡ് മഹാമാരിയെക്കുറിച്ചും വാക്സിനേഷനെക്കുറിച്ചും വിശദീകരിച്ച നിതി ആയോഗ് അംഗം ഡോ. വി.കെ. പോള് രാജ്യത്ത് രണ്ടാംതരംഗം ഇതുവരെ അവസാനിച്ചിട്ടില്ലെന്നും കൂട്ടിച്ചേര്ത്തു.
അതെ സമയം അടുത്തിടെ രാജ്യത്ത് പ്രതിദിന കോവിഡ് കണക്കുകളില് കുറവ് രേഖപ്പെടുത്തുന്നുണ്ട്. എന്നാല് ജൂണ് 23 നും 29 നും ഇടയിലെ കണക്കനുസരിച്ച് 71 ജില്ലകളില് പോസിറ്റിവിറ്റി നിരക്ക് 10 ശതമാനത്തില് കൂടുതലാണെന്നും ആരോഗ്യ മന്ത്രാലയം ജോയിന്റ് സെക്രട്ടറി ലവ് അഗര്വാള് ചൂണ്ടിക്കാട്ടി. “രാജ്യം മൊത്തം സുരക്ഷതരാകുന്നതുവരെ ആര്ക്കും സുരക്ഷിതരായിരിക്കില്ല. സുരക്ഷയില് വിട്ടുവീഴ്ച വരുത്താന് കഴിയില്ല. വൈറസ് ഇപ്പോഴും വികസിച്ചുകൊണ്ടിരിക്കുകയാണ് .”വി.കെ. പോള് പറഞ്ഞു.
കേരളം, ത്രിപുര, ഒഡീഷ, അരുണാചല് പ്രദേശ്, ഛത്തീസ്ഗഡ്, മണിപ്പൂര് എന്നവിടങ്ങളില് പ്രതിദിന കോവിഡ് കേസുകള് ഉയരുന്നതിനാല് കേന്ദ്രസര്ക്കാറിന്റെ മള്ട്ടി ഡിസിപ്ലിനറി സംഘത്തെ ഇവിടങ്ങളിലേക്ക് അയച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു.
സംസ്ഥാനങ്ങളിലെ ഗ്രാമീണ മേഖലയില് മൂന്നാംതരംഗം നേരിടുന്നതിനായി ഒരുക്കങ്ങള് നടത്തണം. കുട്ടികള്ക്കായി പരിശോധന സംവിധാനങ്ങള്, മരുന്നുകള്, വെന്റിലേറ്ററുകള്, സുരക്ഷ മുന്കരുതലുകള് തുടങ്ങിയവ സ്വീകരിക്കണമെന്നും കൂടുതല് ജാഗ്രത പുലര്ത്തുകയാണെങ്കില് മൂന്നാംതരംഗത്തെ ഒഴിവാക്കാമെന്നും പോള് കൂട്ടിച്ചേര്ത്തു .