![“Manju”](https://santhigirinews.org/wp-content/uploads/2020/04/YOUTUBE.jpg")
ദുബൈ: ഡയാന രാജകുമാരിയുടെ പേരില്‍ ബ്രിട്ടീഷ് രാജകുടുംബം നല്‍കുന്ന ഡയാന പുരസ്കാരം മലയാളി വിദ്യാര്‍ഥികള്‍ക്ക്. ഇന്ത്യയിലും യു.എ.ഇയിലും പഠിക്കുന്ന മലയാളി വിദ്യാര്‍ഥികളാണ് പുരസ്കാരം നേടിയത്.
പാലാ രാമപുരം കൂട്ടക്കല്ലില്‍ ജോനേഷ് ജോസഫിന്റെയും വര്‍ഷയുടെയും മകള്‍ നിലീന മറിയം ജോനേഷാണ് പുരസ്കാരം നേടിയ ഏറ്റവും പ്രായം കുറഞ്ഞ ഇന്ത്യന്‍ വിദ്യാര്‍ഥി. വെര്‍ച്വല്‍ ചടങ്ങില്‍ പുരസ്കാരങ്ങള്‍ വിതരണം ചെയ്തു.
ചാരിറ്റി, പരിസ്ഥിതി പ്രവര്‍ത്തനങ്ങള്‍ മുന്‍നിര്‍ത്തി ഡയാന രാജകുമാരിയുടെ മക്കളും സഹോദരനും ചേര്‍ന്നാണ് പുരസ്കാരം നല്‍കുന്നത്. ഒമ്ബത് മുതല്‍ 25 വയസ്സ് വരെയുള്ളവര്‍ക്ക് അപേക്ഷിക്കാം. കോവിഡ് കാലത്തെ പ്രവര്‍ത്തനങ്ങള്‍ കൂടി മുന്‍നിര്‍ത്തിയാണ് ഒമ്ബതുവയസ്സുകാരിയായ നിലീനക്ക് പുരസ്കാരം ലഭിച്ചത്.
സ്കൂളിലെ എക്കോ കോഓഡിനേറ്റര്‍ അഫ്രീന്‍ ഭാനുവാണ് നിലീനയെ നാമനിര്‍ദേശം ചെയ്തത്. അടുത്തിടെ ശൈഖ് ഹംദാന്‍ പുരസ്കാരവും നിലീന നേടിയിരുന്നു. ഷാര്‍ജ ഭരണാധികാരിയുടെ ഭാര്യ ശൈഖ ജവാഹര്‍ ബിന്‍ത് മുഹമ്മദ് അല്‍ ഖാസിമി മുന്‍കൈയെടുത്ത് നടത്തുന്ന ഫ്രണ്ട്സ് ഓഫ് കാന്‍സര്‍ പേഷ്യന്‍റിന്റെ ഭാഗമായി അര്‍ബുദം ബാധിച്ച കുട്ടികള്‍ക്ക് കളിപ്പാട്ടങ്ങള്‍ എത്തിക്കുന്ന പദ്ധതിയില്‍ പങ്കാളിയായിരുന്നു.
റമദാന്‍ മാസത്തില്‍ മാതാപിതാക്കളോടൊപ്പം ലേബര്‍ ക്യാമ്ബുകളിലെത്തി ഭക്ഷണപ്പൊതികള്‍ വിതരണം ചെയ്തിരുന്നു. ഓട്ടിസം ബാധിച്ച കുട്ടികളെ മുഖ്യധാരയിലേക്ക് ഉയര്‍ത്തുന്ന പദ്ധതിയിലും സജീവമാണ്. ജെംസ് മില്ലേനിയം സ്കൂളിലെ വിദ്യാര്‍ഥിയാണ് നിലീന.നിലവില്‍ തെരഞ്ഞെടുക്കപ്പെട്ട അവാര്‍ഡ് ജേതാക്കളില്‍ നിന്ന് 20 പേരെ ഡിസംബറില്‍ തിരഞ്ഞെടുത്ത് ഡയാന ലെഗസി പുരസ്കാരം നല്‍കും.
