നികുതി വെട്ടിപ്പ് :ഫിനാന്ഷ്യല് ഓഫീസര് അറസ്റ്റിൽ
വാഷിങ്ടണ്: നികുതിവെട്ടിപ്പ് നടത്തിയതിന് മുന് യു.എസ് പ്രസിഡന്റ് ഡോണള്ഡ് ട്രംപിന്റെ ചീഫ് ഫിനാന്ഷ്യല് ഓഫീസര് അലന് വെയീസ്ബെര്ഗിനെ അറസ്റ്റ് ചെയ്തു. ട്രംപിന്റെ കമ്പനിയിലെ നികുതിവെട്ടിപ്പുമായി ബന്ധപ്പെട്ടാണ് അറസ്റ്റ്. ഏകദേശം 15 വര്ഷത്തോളം നികുതിവെട്ടിപ്പ് നടത്തിയെന്നാണ് കണ്ടെത്തിയിരിക്കുന്നത്. വ്യാഴാഴ്ച രാത്രിയാണ് മാന്ഹട്ടന് കോടതി ചീഫ് ഫിനാന്ഷ്യല് ഓഫീസര്ക്കെതിരെ കുറ്റം ചുമത്തിയത്.ട്രംപിന്റെ കമ്പനികളില് രണ്ട് തരത്തിലുള്ള അക്കൗണ്ട് ബുക്കുകളാണ് കൈകാര്യം ചെയ്തിരുന്നത്. ഒന്ന് കമ്പനിയുടെ അഭ്യന്തര ഉപയോഗത്തിനായിരുന്നു. ഈ ബുക്കില് ജീവനക്കാര്ക്ക് നല്കുന്ന അപ്പാര്ട്ട്മെന്റ്, കാര്, ഫര്ണീച്ചര്, ട്യൂഷന് പേയ്മെന്റ്, ഗിഫ്റ്റുകള് എന്നിവക്കായി മുടക്കിയ മുഴുവന് പണത്തിന്റേയും വിവരങ്ങളാണ് ഉണ്ടാവുക. എന്നാല്, രണ്ടാമത്തെ ബുക്കില് ഇതുസംബന്ധിച്ച വിവരങ്ങളൊന്നും ഉണ്ടായിരുന്നില്ല. ഈ ബുക്കാണ് നികുതി വകുപ്പിന് കൈമാറിയതെന്നാണ് റിപ്പോര്ട്ട്. ഇതിലൂടെ 15 വര്ഷത്തോളം നികുതിവെട്ടിച്ചുവെന്നാണ് കണ്ടെത്തിയിരിക്കുന്നത്.