പൊതുമേഖല സ്ഥാപനങ്ങള്ക്ക് ഏകീകൃത ശമ്പളഘടന
തിരുവനന്തപുരം: പൊതുമേഖല സ്ഥാപനങ്ങള്ക്ക് ഏകീകൃത ശമ്പളഘടന സംബന്ധിച്ച ശുപാര്ശകള് സമര്പ്പിക്കാന് ചീഫ് സെക്രട്ടറിതല സമിതിയെ ചുമതലപ്പെടുത്തി. നേരത്തേ റിയാബ് ചെയര്മാന്റെ നേതൃത്വത്തിലെ വിദഗ്ധസമിതിയെ ഇതിനായി ചുമതലപ്പെടുത്തിയിരുന്നു.
കെ.എസ്.ഇ.ബി, കെ.എസ്.ആര്.ടി.സി, വാട്ടര് അതോറിറ്റി ഒഴികെ പൊതുമേഖല സ്ഥാപനങ്ങളുടെ ശമ്പളഘടനയെ സംബന്ധിച്ച റിപ്പോര്ട്ട് 2020 നവംബര് 30 ന് സമര്പ്പിച്ചിരുന്നു. ശുപാര്ശ പരിശോധിച്ചാണ് സമിതിക്ക് ഇപ്പോള് രൂപം നല്കിയിരിക്കുന്നത്.
ചീഫ് സെക്രട്ടറി ചെയര്മാനും ധനകാര്യവിഭാഗം അഡീഷനല് ചീഫ് സെക്രട്ടറി, ജലവിഭവ അഡീ. ചീഫ് സെക്രട്ടറി, സാമ്പത്തിക കാര്യ വകുപ്പ് അഡീഷനല് ചീഫ് സെക്രട്ടറി, വ്യവസായ– വൈദ്യുതി– ഗതാഗത വകുപ്പ് പ്രിന്സിപ്പല് സെക്രട്ടറിമാര് എന്നിവര് അംഗങ്ങളുമായ ഏഴംഗ സമിതി രൂപവത്കരിച്ചാണ് സര്ക്കാര് ഉത്തരവ് പുറപ്പെടുവിച്ചിരിക്കുന്നത്.