ചൈനയിൽ വീണ്ടും കൊറോണ വ്യാപനം ശക്തമാകുന്നു

ബെയ്ജിംഗ് : ചൈനയിൽ കൊറോണ വ്യാപനം വീണ്ടും രൂക്ഷമാകുന്നു. ചൈനയിലെ തിരക്കേറിയ നഗരങ്ങളിലൊന്നായ നാൻജിംഗിലാണ് വൈറസ് വ്യാപനം രൂക്ഷമാകുന്നത്. ജൂലൈ 20 വരെ നഗരത്തിൽ മാത്രം 200 കേസുകളാണ് റിപ്പോർട്ട് ചെയ്തിരിക്കുന്നത്.

നാൻജിംഗിലെ വിമാനത്താവളം വഴി യാത്ര ചെയ്തവരിലാണ് രോഗവ്യാപനം കൂടുതലായുള്ളത്. ഇതിന്റെ പശ്ചാത്തലത്തിൽ ആഗസ്റ്റ് 11 വരെ വിമാനത്താവളത്തിന്റെ പ്രവർത്തനം നിർത്തിവെച്ചു. വേഗത്തിൽ രോഗവ്യാപനം കണ്ടെത്തുന്നതിനായി കൂട്ട പരിശോധനയും നടത്തിവരുന്നുണ്ട്.

കൊറോണയുടെ ഡെൽറ്റ വകഭേദമാണ് അതിവേഗം വ്യാപിക്കുന്നത് എന്നാണ് കണ്ടെത്തൽ. ഇതിന്റെ അടിസ്ഥാനത്തിൽ ജനങ്ങൾക്ക് ജാഗ്രതാ നിർദ്ദേശം നൽകിയിട്ടുണ്ട്. കർശനമായി മാസ്‌കുകൾ ധരിക്കണമെന്നും, ആളുകളുമായി ഇടപഴകുമ്പോൾ സമൂഹിക അകലം പാലിക്കണമെന്നുമാണ് നിർദ്ദേശം.

ജൂലൈ 10 ന് റഷ്യയിൽ നിന്നുള്ള വിമാനത്തിൽ നാൻജിംഗിൽ എത്തിയവരിലാണ് വ്യാപകമായി രോഗം സ്ഥിരീകരിച്ചിരിക്കുന്നത്. വിമാനത്തിലെ ശുചീകരണ തൊഴിലാളികളാണ് രോഗവ്യാപനത്തിന് കാരണമെന്ന തരത്തിൽ റിപ്പോർട്ടുകൾ പ്രചരിക്കുന്നുണ്ട്. വിമാനം ശുചീകരിക്കുന്നതിൽ തൊഴിലാളികൾക്ക് പറ്റിയ വീഴ്ചയാണ് വീണ്ടും രോഗവ്യാപനത്തിന് ഇടയാക്കിയത് എന്നാണ് റിപ്പോർട്ടുകൾ.

വാക്‌സിൻ സ്വീകരിച്ചവരിലും രോഗം സ്ഥിരീകരിക്കുന്നത് ആളുകളിൽ വാക്‌സിന്റെ ഫലപ്രാപ്തി സംബന്ധിച്ച സംശയങ്ങൾക്ക് കാരണമായിട്ടുണ്ട്. ചൈനീസ് വാക്‌സിൻ കൊറോണയുടെ ഡെൽറ്റാ വകഭേദത്തെ പ്രതിരോധിക്കാൻ ഫലപ്രദമല്ലെന്ന് ആളുകൾ പറയുന്നു.