![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: കോവിഡ് കാലത്ത് ജീവനക്കാരുടെ മാനസിക -ശാരീരിക ആരോഗ്യം മെച്ചപ്പെടുത്താന്‍ ബോണസും ലോട്ടറിയും പ്രഖ്യാപിച്ച്‌ ഓണ്‍ലൈന്‍ ബ്രോക്കിങ് കമ്ബനിയായ സിറോധ.
കോവിഡ് കാലത്ത് ജീവനക്കാര്‍ വ്യായാമം, ഭക്ഷണം എന്നിവയില്‍ ശ്രദ്ധ നല്‍കാതെ വന്നതോടെ ശാരീരിക മാനസിക ആരോഗ്യ പ്രശ്നങ്ങള്‍ നേരിട്ടിരുന്നു. ഇത് കണക്കിലെടുത്താണ് സിറോധ സി.ഇ.ഒ നിതിന്‍ കമത് ‘ഗെറ്റ് ഹെല്‍ത്തി’ പരിപാടി ആവിഷ്കരിച്ചത്. പരിപാടിയുടെ കീഴില്‍ തൊഴിലാളികള്‍ക്ക് ഒരു മാസത്തെ ശമ്പളം ബോണസായും ലക്കി ഡ്രോയിലൂടെ 10 ലക്ഷം രൂപയും ലഭിക്കും.
‘കമ്ബനിയിലെ എല്ലാവരോടും 12 മാസം ആരോഗ്യത്തില്‍ ശ്രദ്ധ ചെലുത്താന്‍ ആവശ്യെപ്പട്ടു. ഓരോ മാസവും ആരോഗ്യത്തെക്കുറിച്ച്‌ അപ്ഡേറ്റ് ചെയ്യണം. ഇതില്‍ പങ്കാളിത്തം ഉറപ്പാക്കുന്നതിനായി ലക്ഷ്യത്തിലെത്തുന്നവര്‍ക്ക് ഒരു മാസത്തെ ശമ്ബളം ബോണസായും ലക്കി ഡ്രോയിലൂടെ 10 ലക്ഷം രൂപയും നല്‍കും’ -കമത് ട്വീറ്റ് ചെയ്തു.
കോവിഡ് മഹാമാരി പടര്‍ന്നുപിടിച്ചതുമുതല്‍ കമ്ബനികള്‍ വര്‍ക് ഫ്രം ഹോം സംവിധാനം നടപ്പിലാക്കിയിരുന്നു. ഇതോടെ മള്‍ട്ടി നാഷനല്‍ കമ്ബനികള്‍ ജീവനക്കാര്‍ക്കായി പലതരം ബോണസുകളും മറ്റും നല്‍കിയിരുന്നു. എന്നാല്‍ ദീര്‍ഘനേരമുള്ള ഇരിപ്പും ഓഫീസ് അന്തരീക്ഷം ഇല്ലാത്തതും തൊഴിലാളികളില്‍ മാനസിക പിരിമുറക്കങ്ങള്‍ക്ക് ഇടവരുത്തുന്നതായി റിപ്പോര്‍ട്ട് വന്നിരുന്നു. കൂടാതെ നിരവധി ആരോഗ്യ പ്രശ്നങ്ങളും റിപ്പോര്‍ട്ട് ചെയ്തിരുന്നു.
