ഇന്ത്യയുടെ സൂപ്പർ ഡബിൾസ് താരങ്ങൾ വേർപിരിഞ്ഞതിങ്ങനെ

മുംബൈ: കായിക ലോകം എക്കാലത്തും ആരാധനയോടെ ഉറ്റുനോക്കിയ ജോഡിയാണ് മഹേഷ് ഭൂപതിയും ലിയാൻഡർ പേസും. ടെന്നീസ് ലോകത്തെ വിജയകിരീടങ്ങൾ നിരവധി തവണ ചൂടിയവർ ഗ്രാൻഡ്സ്ലാം കിരീടം ചൂടിയ ആദ്യ ഇന്ത്യൻ ടീം അങ്ങനെ വിശേഷണങ്ങൾ ഏറെയാണ് ഇരുവർക്കും.

ഇരുവരും പിരിഞ്ഞ വാർത്ത ഏറെ ഞെട്ടലോടെയായിരുന്നു ആരാധകലോകം കേട്ടത്. താരങ്ങൾ തമ്മിലുള്ള അഭിപ്രായ വ്യത്യാസങ്ങളും അസ്വാരസ്യങ്ങളും പരസ്യമായിരുന്നെങ്കിലും ടെന്നീസ് ഇതിഹാസങ്ങൾ പിരിയുമെന്ന് ആരും കരുതിയിരുന്നില്ല. ഇവർ തമ്മിൽ പിരിയാനുള്ള കാരണങ്ങൾ ഇന്നും ആരാധകലോകത്തിന് അജ്ഞമാണ്.ഇടക്കാലത്ത് പലകഥകളും പുറത്ത് വന്നിരുന്നെങ്കിലും ഇരു താരങ്ങളും ഇതിനോടൊന്നും പ്രതികരിച്ചിരുന്നില്ല.

ഏറ്റവും ഒടുവിൽ തങ്ങൾ പിരിയാനുണ്ടായ കാരണം വെളിപ്പെടുത്തിയിരിക്കുകയാണ് താരങ്ങൾ.ലിയാൻഡർ തന്റെ കാമുകിയുമായി ബന്ധപ്പെട്ട കാര്യങ്ങൾ ചോദിച്ചതാണ് മഹേഷിനെ ചൊടിപ്പിച്ചതെന്നാണ് ലിയാൻഡറിന്റെ വെളിപ്പെടുത്തൽ. ഇരു താരങ്ങളും ടെന്നീസ് ലോകത്ത് നിറഞ്ഞു നിന്നിരുന്ന സമയത്ത് പേസിന്റെ കാമുകിയേയും മഹേഷിനേയും ചേർത്ത് പല കഥകളും പാപ്പരാസികൾ പ്രചരിപ്പിച്ചിരുന്നു.

കഥകളെല്ലാം കേൾക്കാനിടയായ പേസ് മഹേഷിനോട് ഇതിനെ കുറിച്ച് ചോദിച്ചു. ‘നിങ്ങൾ ഈ കഥകൾ വിശ്വസിക്കുന്നുണ്ടോ… ? ഞാൻ അത്തരക്കാരനാണെന്ന് കരുതുന്നുണ്ടോ ? എന്നായിരുന്നു മഹേഷിന്റെ ചോദ്യം. അതെ എന്നായിരുന്നു പേസ് നൽകിയ ഉത്തരം. മറിച്ചൊരു മറുപടി പ്രതീക്ഷിച്ച മഹേഷിനെ പേസിന്റെ ഉത്തരം ആകെ തകർത്തു.ഇവിടം മുതൽക്കാണ് ഇരുവരും തമ്മിലുള്ള പ്രശ്‌നങ്ങൾ ആരംഭിക്കുന്നത്. അഭിപ്രായ വിത്യാസത്തിൽ തുടങ്ങി ഇരുവരും പിരിയുന്ന ഘട്ടം വരെയെത്തി പിന്നീട് കാര്യങ്ങൾ.പരസ്പര വിശ്വാസം തകർന്നുവെന്നും പിരിയുകയാണെന്നും താരങ്ങൾ പിന്നീട് കായിക ലോകത്തെ അറിയിച്ചു.

കഴിഞ്ഞ ദിവസം ഇരുവരുടേയും കരിയറിലെ ഉയർച്ചകളും താഴ്ചകളും പിണക്കങ്ങളും ഇണക്കങ്ങളും പ്രമേയമാക്കി ഒരു ടെലിവിഷൻ പരമ്പര സംപ്രേഷണം ആരംഭിച്ചിരുന്നു.ഇതോടെയാണ് ഏറെ കാലമായി ആരാധകർ അന്വേഷിക്കുന്ന ചോദ്യത്തിന് താരം ഉത്തരം നൽകിയത്.

ദമ്പതിമാരായ നിതേഷും അശ്വനി അയ്യർ തിവാരിയും ചേർന്ന് സംവിധാനം ചെയ്യുന്ന ടെലിവിഷൻ പരമ്പരയിലാണ് ടെന്നീസ് ഇതിഹാസ ജോഡിയുടെ കഥ പറയുന്നത്. ബ്രേക്ക് പോയിന്റ് എന്ന് പേരിട്ടിരിക്കുന്ന പരമ്പര സീ5 ലൂടെയാണ് പ്രക്ഷേപണം ചെയ്യുന്നത്.