ദുബൈ എയര്ഷോക്ക് ഇന്ന് തുടക്കം
ദുബൈ: ലോകത്തെ ഏറ്റവും വലിയ വ്യോമയാന പ്രദര്ശനങ്ങളിലൊന്നായ ദുബൈ എയര് ഷോക്ക് ഞായറാഴ്ച തുടക്കം. വ്യാഴാഴ്ച വരെ നടക്കുന്ന എയര്ഷോയില് പങ്കെടുക്കുന്നതിനായി വിമാനങ്ങളും വിമാന നിര്മാതാക്കളും വ്യോമയാന വിദഗ്ധരും കമ്പനി ഉടമകളും ഭരണാധികാരികളുമെല്ലാം എത്തിച്ചേരും. 148 രാജ്യങ്ങളില്നിന്നായി 1200 പ്രദര്ശകരെത്തുന്ന ഇത്തവണത്തെ മേള, ഇതുവരെ നടന്നതില് ഏറ്റവും വലുതാണെന്ന് അധികൃതര് അവകാശപ്പെട്ടു.
85,000 സന്ദര്ശകരാണ് ഇതിനകം രജിസ്റ്റര് ചെയ്തിട്ടുള്ളത്. ഇത്തവണ പങ്കെടുക്കുന്നവരില് 13 രാജ്യങ്ങള് എയര്ഷോയില് ആദ്യമായാണ് എത്തുന്നത്. മില്യണ് കണക്കിന് ഡോളറിന്റെ വ്യാപാര ഇടപാടുകള് നടക്കുന്ന എയര്ഷോ ദുബൈ വേള്ഡ് സെന്ററിലാണ് അരങ്ങേറുക. ബോയിങ് കുടുംബത്തിലെ ഏറ്റവും പുതിയ താരമായ ബോയിങ് 777Xന്റെ അരങ്ങേറ്റം ഇത്തവണത്തെ പ്രധാന ആകര്ഷണമാണ്. 2023 ഓടെ സര്വിസ് തുടങ്ങുമെന്ന് പ്രതീക്ഷിക്കുന്ന വിമാനം ഏറ്റെടുക്കാന് നിരവധി കമ്പനികള് എത്തും.
കോവിഡ് മാനദണ്ഡങ്ങള് പാലിച്ചാണ് സന്ദര്ശകര്ക്ക് അനുമതി നല്കുകയെന്ന് അധികൃതര് അറിയിച്ചിട്ടുണ്ട്. കോവിഡ് എത്തിയ ശേഷം ആദ്യമായി നടക്കുന്ന ഏറ്റവും വലിയ എയര്ഷോയാണിത്. രണ്ടു വര്ഷത്തിലൊരിക്കലാണ് മേള നടക്കുന്നത്. ഓരോവര്ഷവും 100 ബില്യണ് ഡോളറിലേറെ മൂല്യമുള്ള കരാറുകള് ഒപ്പുവെക്കാറുണ്ട്. യു.എ.ഇ പ്രതിരോധ വകുപ്പ്, എമിറേറ്റ്സ് ഉള്പ്പെടെയുള്ളവ ആയിരം കോടിയിലേറെ ദിര്ഹമിന്റെ കരാറുകള് ഒപ്പുവെക്കും. വിവിധ രാജ്യങ്ങള് തമ്മില് വിമാന കൈമാറ്റ കരാറുകളും ഒപ്പുവെക്കാറുണ്ട്. പോര്വിമാനങ്ങളും ആഡംബര വിമാനങ്ങളും ഹെലികോപ്ടറുകളും സൈനിക വിമാനങ്ങളും ഉണ്ടാവും. ആളില്ലാ വിമാനങ്ങള്, ചരക്ക് വിമാനം, സാങ്കേതിക വിദ്യകള് എന്നിവ പ്രദര്ശനത്തിനെത്തും. യു.എ.ഇയുടെ ആകാശ വിസ്മയങ്ങളും എയര്ഷോയില് അരങ്ങേറും.
16 വര്ഷത്തെ ഇടവേളക്കു ശേഷം ഇന്ത്യന് വ്യോമസേനയുടെ അഭ്യാസ പ്രകടനം ഇത്തവണ ദുബൈ എയര്ഷോയിലുണ്ടാകും. 2005ലെ അല്ഐന് ഗ്രാന്ഡ് പ്രിയിലാണ് ഇന്ത്യന് സംഘം യു.എ.ഇയില് അവസാനമായി വ്യോമാഭ്യാസം നടത്തിയത്. സാരംഗ്, സൂര്യകിരണ്, തേജസ് എന്നിവയുടെ അഭ്യാസങ്ങള്ക്കാണ് എയര്ഷോ സാക്ഷ്യം വഹിക്കാനൊരുങ്ങുന്നത്.