തിരുവനന്തപുരം: ഹയര് സെക്കന്ററി ഉത്തരക്കടലാസ് പുനഃപരിശോധനയില് ഇനി മുതല് ഒരു മാര്ക്ക് വര്ധിച്ചാലും വിദ്യാര്ഥിക്ക് ലഭ്യമാക്കും. ഇതിലൂടെ ലഭിക്കുന്ന സ്കോറുകള് പരമാവധി മാര്ക്കിന്റെ 10 ശതമാനത്തില് താഴെയാണെങ്കില് ഇങ്ങനെ ലഭിക്കുന്ന രണ്ട് സ്കോറുകളുടെയും ശരാശരി മാര്ക്ക് കുട്ടിക്ക് ലഭ്യമാക്കും.
വ്യത്യാസം 10 ശതമാനമോ അതില് കൂടുതലോ ആണെങ്കില് മൂന്നാമതും മൂല്യനിര്ണയത്തിന് വിധേയമാക്കും. അതില് ലഭിക്കുന്ന സ്കോറും ഇരട്ടമൂല്യനിര്ണയത്തിലൂടെ ലഭിക്കുന്ന സ്കോറുകളുമായി ഏറ്റവും അടുത്തുള്ള സ്കോറിന്റെയും ശരാശരിയായിരിക്കും നല്കുക. പുനഃപരിശോധനയില് ലഭിക്കുന്ന സ്കോര് കുറവാണെങ്കില് ആദ്യം ലഭിച്ചത് നിലനിര്ത്തും.
ഹയര് സെക്കന്ഡറി ഡ്യൂപ്ലിക്കേറ്റ് സര്ട്ടിഫിക്കറ്റിന് അപേക്ഷിക്കാന് ഫസ്റ്റ് ക്ലാസ് മജിസ്ട്രേറ്റിന്റെ സത്യവാങ്മൂലം വേണമെന്ന വ്യവസ്ഥ ഒഴിവാക്കി. പകരം നോട്ടറിയില് നിന്നുള്ള സത്യവാങ്മൂലം മതി. ഹയര് സെക്കന്ഡറി പരീക്ഷയില് ഏതെങ്കിലും വിഷയത്തില് പരാജയപ്പെടുന്നവര് ഈ വിഷയത്തിന്റെ രണ്ടു വര്ഷത്തെയും പേപ്പറുകള് എഴുതണമെന്ന (കമ്ബാര്ട്ട്മെന്റല്) വ്യവസ്ഥയും ഒഴിവാക്കി. പകരം ജയിക്കാനാകാത്ത വിഷയങ്ങള്ക്ക് ഒന്നാം വര്ഷമോ രണ്ടാം വര്ഷമോ താല്പര്യമനുസരിച്ച് രജിസ്റ്റര് ചെയ്ത് പരീക്ഷ എഴുതാം.
ഒന്നാം വര്ഷ പരീക്ഷയാണ് രജിസ്റ്റര് ചെയ്യുന്നതെങ്കില് രണ്ടാം വര്ഷത്തെ പരീക്ഷയുടെ ഉയര്ന്ന സ്കോറും രണ്ടാം വര്ഷ പരീക്ഷയാണ് രജിസ്റ്റര് ചെയ്യുന്നതെങ്കില് ഒന്നാം വര്ഷത്തെ ഉയര്ന്ന സ്കോറും നിലനിര്ത്തും.
രണ്ടാം വര്ഷ തീയറി പരീക്ഷ എഴുതിയ വിദ്യാര്ഥിക്ക് പ്രായോഗിക പരീക്ഷ എഴുതാന് സാധിക്കാതെ വന്നാല് ‘സേ’ പരീക്ഷയില് പ്രായോഗിക പരീക്ഷ മാത്രമായി എഴുതാം. രാവിലെയും ഉച്ചക്കു ശേഷവുമായുള്ള സെഷനുകളില് 60, 80 മാര്ക്കിനുള്ള 13 വീതം ഉത്തരക്കടലാസ് മൂല്യനിര്ണയം നടത്തിയിരുന്നത് 17 വീതമാക്കി (ദിവസം 34 എണ്ണം) ഉയര്ത്തി. 30 മാര്ക്കിനുള്ള ഉത്തരക്കടലാസുകള് (ബോട്ടണി, സുവോളജി, മ്യൂസിക്) 20 വീതം മൂല്യനിര്ണയം നടത്തിയിരുന്നത് 25 ആക്കിയും (ദിവസം 50) ഉയര്ത്തി. പരീക്ഷ കഴിഞ്ഞ് സ്കീം ഫൈനലൈസേഷന് നടത്തി ചോദ്യപേപ്പറും ഉത്തരസൂചികയും ഹയര് സെക്കന്ഡറി പോര്ട്ടലില് പ്രസിദ്ധപ്പെടുത്തും.
സര്ട്ടിഫിക്കറ്റില് ഗ്രേസ് മാര്ക്ക് പ്രത്യേകം രേഖപ്പെടുത്തും
സര്ട്ടിഫിക്കറ്റില് ഗ്രേസ് മാര്ക്ക് പരീക്ഷ മാര്ക്കിനൊപ്പം ചേര്ക്കാതെ പ്രത്യേകമായി രേഖപ്പെടുത്തും. നേരത്തേ ഗ്രേസ് മാര്ക്ക് പരീക്ഷ മാര്ക്കിനൊപ്പം ചേര്ത്ത് ‘ഗ്രേസ് മാര്ക്ക് അവാര്ഡഡ്’ എന്ന് രേഖപ്പെടുത്തുന്നതായിരുന്നു രീതി. പല വിദ്യാഭ്യാസ സ്ഥാപനങ്ങളും ഗ്രേസ് മാര്ക്ക് ഒഴിവാക്കിയുള്ള സര്ട്ടിഫിക്കറ്റ് ആവശ്യപ്പെടുന്ന സാഹചര്യത്തിലാണിത്. ഗ്രേസ് മാര്ക്കിലൂടെ ലഭിക്കുന്ന പരമാവധി സ്കോര് 90 ശതമാനമായി നിജപ്പെടുത്തി.
മൂല്യനിര്ണയം കഴിഞ്ഞ ഉത്തരക്കടലാസുകള് ക്യാമ്ബുകളില് സൂക്ഷിക്കുന്നതിന്റെ കാലാവധി രണ്ടു വര്ഷത്തില് നിന്ന് ഒരു വര്ഷമായി കുറച്ചിട്ടുണ്ട്.