ന്യൂഡല്ഹി: ഭിന്നശേഷിക്കാരനായ കുട്ടിയെ ഇന്ഡിഗോ വിമാനത്തില് യാത്ര ചെയ്യുന്നതു തടഞ്ഞെന്ന പരാതിയില് ഇടപെട്ടു സിവില് വ്യോമയാന മന്ത്രി ജ്യോതിരാദിത്യ സിന്ധ്യ. ശനിയാഴ്ച റാഞ്ചി വിമാനത്താവളത്തില് ഭിന്നശേഷിക്കാരനായ കുട്ടി യാത്ര ചെയ്യുന്നതിനെ ഇന്ഡിഗോ അധികൃതര് തടഞ്ഞെന്നാണു പരാതി. മറ്റു യാത്രക്കാരുടെ സുരക്ഷ അപകടത്തിലാകും എന്നു പറഞ്ഞാണ് അധികൃതര് കുട്ടിയുടെ യാത്ര നിഷേധിച്ചത്. മന്ത്രിയുടെ ഇടപെടലിനെത്തുടര്ന്ന് ഇന്ഡിഗോ വിമാനക്കമ്പനിയുടെ സിഇഒ റോണോജോയ് ദത്ത ഖേദം പ്രകടിപ്പിച്ചു.
കുട്ടി വിമാനത്തില് കയറുന്നതിനുമുന്പ് അസ്വസ്ഥത പ്രകടിപ്പിച്ചിരുന്നു. അവസാന നിമിഷം വരെ ഗ്രൗണ്ട് സ്റ്റാഫ് കുട്ടി ശാന്തനാകാന് കാത്തിരുന്നെങ്കിലും ഫലമുണ്ടായില്ല. കുട്ടിയുടെ അസ്വസ്ഥത മറ്റു യാത്രക്കാരെയും ബാധിച്ചേക്കാം എന്നു കരുതിയാണ് കുട്ടിക്ക് പ്രവേശനം നിഷേധിച്ചത്. തുടര്ന്ന് കുട്ടിക്കും കുടുംബത്തിനും താമസസൗകര്യം നല്കിയെന്നും തൊട്ടടുത്ത ദിവസം തന്നെ യാത്രയ്ക്കുള്ള സജ്ജീകരണങ്ങള് ഏര്പ്പെടുത്തിയതായും വിമാനക്കമ്പനി അറിയിച്ചു.