ഗുരുവിന്റെ ത്യാഗവും സഹനവും നാം അറിയണം: സ്വാമി ഭക്തദത്തൻ ജ്ഞാനതപസ്വി

പോത്തൻകോട് : ഗുരുവിൻ്റെ ജന്മങ്ങളായുള്ള ജീവിതത്തെയും സഹനത്തെയും നാം അറിയണമെന്ന് ശാന്തിഗിരി ആശ്രമം ചേർത്തല ഏരിയ ഓഫീസ് ഹെഡ് സ്വാമിഭക്തദത്തൻ ജ്ഞാനതപസ്വി പറഞ്ഞു. നവഒലിജ്യോതിർദിനം – 25 സർവ്വമംഗള സുദിനത്തോടനുബന്ധിച്ച് ശാന്തിഗിരി ആത്മവിദ്യാലയത്തിന്റെ ആഭിമുഖ്യത്തിൽ തമിഴ് ഭാഷയിൽ നടന്ന പതിനൊന്നാം ദിവസത്തെ (ഏപ്രിൽ 24) പ്രഭാഷണ പരമ്പരയിൽ പങ്കെടുത്ത് സംസാരിക്കുകയായിരുന്നു സ്വാമി. ഗുരു ത്രികാലജ്ഞാനിയായി, നമ്മുടെ ഇടയിൽ മനുഷ്യജന്മം സ്വീകരിച്ച്, മനുഷ്യരാശിയെ നേർവഴിയിൽ നയിക്കാൻ എല്ലാ കർമ്മങ്ങളും പൂർണ്ണമായി നിറവേറ്റി ‘സകല ധർമ്മാത്മാവ്’ ആയിത്തീരുകയാണ്.
ഗുരു സ്ഥാപിച്ച ശാന്തിഗിരി ആശ്രമം ഇന്ന് അതേ പാരമ്പര്യത്തിൽ ഗുരുസ്ഥാനീയ അഭിവന്ദ്യ ശിഷ്യപൂജിതയിൽ നയിക്കപ്പെടുന്നു. വളരെ അപൂർവമായ ഗുരു-ശിഷ്യ ബന്ധത്തിൻ്റെ മഹത്തായ ഉദാഹരണമാണിത്.

ഗുരു കാണിച്ചുതരുന്ന ആത്മീയതയാണ് മതങ്ങളിൽ നിന്ന് വിമുക്തമായ ജ്ഞാനത്തിന്റെ പാത. ഇന്ന് ഇന്ത്യയിൽ നിലനിൽക്കുന്ന ദ്രാവിഡ പാരമ്പര്യത്തിന്റെ മഹിമയെക്കുറിച്ച് ഗുരു നമുക്ക് അറിയിച്ചു തന്നു. തമിഴ്നാട്ടിൽ പ്രാചീനകാലത്ത് ജീവിച്ചിരുന്നവരാണ് ത്രികാലങ്ങളെ സാക്ഷാത്കരിച്ച മഹാജ്ഞാനികൾ. ആയിരക്കണക്കിന് വർഷങ്ങളായുള്ള ജ്ഞാനത്തിൻ്റെയും സംസ്‌കാരത്തിൻ്റെയും നാടാണ് തമിഴ്‌നാട്. സംഘകാലത്തിനു മുമ്പുതന്നെ ഋഷിമാരും സിദ്ധന്മാരും ഗുരുപദവിക്ക് തുല്യമായ ധർമ്മത്തിൽ നിന്ന് ശിഷ്യർക്ക് അറിവും ജ്ഞാനവും പഠിപ്പിച്ചിരുന്നു. മതം, വിജ്ഞാനം, വൈദ്യം എന്നീ മേഖലകളിൽ ആ നാട് അതുല്യമായ സംഭാവനകൾ നൽകിയിട്ടുണ്ട്. ഒരു സമൂഹമെന്ന നിലയിൽ തമിഴരുടെ ഭക്തി വളരെ ശക്തമാണ്. തമിഴ് ജനതയെ അവരുടെ ദുരിതങ്ങളിൽ നിന്ന് മോചിപ്പിക്കാൻ ഒരു ദൈവിക ശക്തിയുണ്ടെന്ന വിശ്വാസം ആഴത്തിലുള്ളതാണ്. അവരുടെ വിശ്വാസത്തെ അടിസ്ഥാനമാക്കി, കഷ്ടപ്പാടുകളിൽ നിന്ന് മോചനം ലഭിക്കാൻ ഒരു ഗുരുവിനെ സമീപിക്കേണ്ടത് അത്യാവശ്യമാണ്. ഈ സാഹചര്യത്തിൽ നമ്മുടെ ഗുരുവിന്റെ ജീവിത ദർശനത്തിന് മാത്രമേ ആ സമൂഹത്തിൽ ആത്മീയവും ഭൗതികവുമായ മാറ്റം കൊണ്ടുവരാൻ കഴിയൂ എന്നും സ്വാമി പറഞ്ഞു.

കന്യാകുമാരിയിൽ നിന്ന് ഡോ.എസ്.കർപ്പഗവും മധുരൈയിൽ നിന്ന് പി. ജഗദീശനും അനുഭവം പങ്കുവെച്ചു. പ്രഭാഷണ പരമ്പരയുടെ പന്ത്രണ്ടാം ദിനമായ ഇന്ന് ഡോ.കിരൺ.എസ് സംസാരിക്കും.