മുംബൈ: ലോകത്തിലെ ഏറ്റവും വലിയ എലിവേറ്റര് മുംബൈയില് സ്ഥാപിച്ചു. ബാന്ദ്രയിലെ കുര്ല കോംപ്ലക്സിലുള്ള ജിയോ വേള്ഡ് സെന്ററില് ആണ് ലോകത്തിലെ ഏറ്റവും വലിയ എലിവേറ്റര് പണി കഴിപ്പിക്കപ്പെട്ടത്. 25.78 മീറ്റര് സ്ക്വയര് വിസ്തൃതിയുള്ള ഈ ഭീമന് എലിവേറ്ററിന് ഒരു ഇടത്തരം ഫ്ലാറ്റിന്റെ വലുപ്പമുണ്ട്. ലിഫ്റ്റുകള് നിര്മ്മിക്കുന്നതില് അഗ്രഗണ്യരായ ഫിന്ലാന്ഡ് കമ്പനി കോണിയാണ് എലിവേറ്ററിന്റെ നിര്മ്മാതാക്കള്.
18 ഭീമന് പുളളികളിലും ഒന്പത് റോപ്പുകളിലുമായാണ് ഇതിന്റെ പ്രവര്ത്തനം നിയന്ത്രിക്കപ്പെടുന്നത്. കോണി കമ്പനിയുടെ വിദൂര നിയന്ത്രിത സംവിധാനമായ കോണി-ഇ-ലിങ്ക് എന്ന ഫെസിലിറ്റി മാനേജ്മെന്റ് സംവിധാനം ഉപയോഗിച്ച് എവിടെ നിന്ന് വേണമെങ്കിലും ഈ എലിവേറ്റര് നിയന്ത്രിക്കാന് സാധിക്കും.
ഗ്ലാസ് കൊണ്ടു നിര്മ്മിച്ച നാല് വാതിലുകള് ആണ് ഈ ഭീമന് എലിവേറ്ററില് ഉള്ളത്. ഇവയ്ക്കിടയില്, ന്യൂസുകളും അപ്ഡേറ്റുകളും കാണുന്ന സ്ക്രീനുകള് സ്ഥാപിച്ചിട്ടുണ്ട്. പതിനെട്ടര ഏക്കര് വിസ്തൃതിയില്, മുംബൈ നഗരമധ്യത്തില് സ്ഥാപിക്കപ്പെട്ട ജിയോ വേള്ഡ് സെന്റര്, ഇന്ത്യയുടെ വ്യാവസായിക, സാമ്പത്തിക, സാംസ്കാരിക കേന്ദ്രമായി മാറുമെന്നാണ് അധികൃതര് പ്രതീക്ഷിക്കുന്നത്.