പ്രളയക്കെടുതിയില്‍ ദുഃഖം രേഖപ്പെടുത്തി പ്രധാനമന്ത്രി

ന്യൂഡല്‍ഹി: പാകിസ്ഥാനിലെ പ്രളയക്കെടുതിയില്‍ ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. വെള്ളപ്പൊക്കത്തില്‍ ഉണ്ടായ നാശനഷ്ടങ്ങള്‍ കാണുമ്പോള്‍ ദുഃഖമുണ്ടെന്നും സാധാരണ നില എത്രയും വേഗം പുനഃസ്ഥാപിക്കുമെന്ന് പ്രതീക്ഷിക്കുന്നുവെന്നും പ്രധാനമന്ത്രി അറിയിച്ചു. പ്രളയത്തില്‍ മരിച്ചവരുടെ എണ്ണം 1,100 ആയി ഉയര്‍ന്നു. സ്ഥിരീകരിക്കാത്ത മരണങ്ങള്‍ ഏറെയുണ്ടെന്നാണ് റിപ്പോര്‍ട്ട്. 33 ദശലക്ഷമോ രാജ്യത്തെ ജനസംഖ്യയുടെ ഏഴിലൊന്നോ ആളുകളെ കുടിയൊഴിപ്പിച്ച പ്രതിസന്ധിയെ നേരിടാന്‍ പാക് പ്രധാനമന്ത്രി ഷെഹ്ബാസ് ഷെരീഫിന്റെ നേതൃത്വത്തിലുള്ള സര്‍ക്കാര്‍ ലോകരാഷ്ട്രങ്ങളോട് സഹായമഭ്യര്‍ത്ഥിച്ചു.

‘പാകിസ്ഥാനിലെ വെള്ളപ്പൊക്കം മൂലമുണ്ടായ നാശനഷ്ടങ്ങള്‍ കാണുമ്പോള്‍ ദുഃഖമുണ്ട്. മരണപ്പെട്ടവരുടെയും പരിക്കേറ്റവരുടെയും കുടുംബങ്ങളോട് ഹൃദയംഗമമായ അനുശോചനം അറിയിക്കുന്നു. സാധാരണ നില എത്രയും വേഗം പുനഃസ്ഥാപിക്കുമെന്ന് പ്രതീക്ഷിക്കുന്നു‘, പ്രധാനമന്ത്രി ട്വീറ്റ് ചെയ്തു.

പ്രകൃതിദുരന്തങ്ങളെ നേരിടാന്‍ ചുമതലപ്പെടുത്തിയ ദേശീയ സംഘടനയായ പാകിസ്ഥാന്റെ ദേശീയ ദുരന്ത നിവാരണ അതോറിറ്റി തിങ്കളാഴ്ച പുറത്തിറക്കിയ ഏറ്റവും പുതിയ കണക്കുകള്‍ പ്രകാരം കുറഞ്ഞത് 1,575 ലധികം ആളുകളാണ് പരിക്കേറ്റ് ചികിത്സയില്‍ കഴിയുന്നത്. നമന്ത്രി മിഫ്താ ഇസ്മായില്‍ പറയുന്നതനുസരിച്ച്‌, വെള്ളപ്പൊക്കം രാജ്യത്തിന്റെ സമ്പദ്‌വ്യവസ്ഥയെ തകരാറിലാക്കി. ഏകദേശം 10 ബില്യണ്‍ ഡോളറോളം നഷ്ടം സംഭവിച്ചു. ദേശീയ ദുരന്ത നിവാരണ അതോറിറ്റിയുടെ ഏറ്റവും പുതിയ കണക്കുകള്‍ പ്രകാരം ഏകദേശം 1,051,570 വീടുകള്‍ക്ക് പൂര്‍ണ്ണമായോ ഭാഗികമായോ കേടുപാടുകള്‍ സംഭവിച്ചു.