റോജര്‍ ബിന്നി ബിസിസിഐ അധ്യക്ഷന്‍

മുംബൈ: മുന്‍ ക്രിക്കറ്റ് താരം റോജര്‍ ബിന്നിയെ ബിസിസിഐയുടെ 36-മത് പ്രസിഡന്റായി തെരഞ്ഞെടുത്തു. 2019-മുതല്‍ പ്രസിഡന്റ് പദത്തിലുണ്ടായിരുന്ന സൗരവ് ഗാംഗുലിക്ക് രണ്ടാം ടേം നിഷേധിച്ചാണ്‌ ബിസിസിഐ ജനറല്‍ ബോഡി റോജര്‍ ബിന്നിയെ തെരഞ്ഞെടുത്തത്. ബോര്‍ഡിന്റെ സെക്രട്ടറിയായി കേന്ദ്ര ആഭ്യന്തര മന്ത്രി അമിത് ഷായുടെ മകന്‍ ജയ് ഷാ തുടരും.
67-കാരനായ ബിന്നി 1983-ലെ ഇന്ത്യയുടെ ലോകകപ്പ് വിജയശില്‍പികളിലൊരാളായിരുന്നു. കര്‍ണാടക ക്രിക്കറ്റ് അസോസിയേഷന്‍ പ്രസിഡന്റുകൂടിയായിരുന്നു അദ്ദേഹം.

ഇന്ന് ചേര്‍ന്ന ബിസിസിഐ ജനറല്‍ ബോഡിയില്‍ ബിന്നി എതിരില്ലാതെയാണ് തിരഞ്ഞെടുക്കപ്പെട്ടത്. ബിസിസിഐ ട്രഷററായി അരുണ്‍ ധുമലിനെ മാറ്റി ബിജെപി എംഎല്‍എ ആശിഷ് ഷേലാറിനെ നിയമിക്കുകയും ചെയ്തു.