മുംബൈ: കോണ്ഗ്രസ് നേതാവ് രാഹുല് ഗാന്ധി നയിക്കുന്ന ഭാരത് ജോഡോ യാത്രയില് പങ്കെടുക്കവേ മഹാരാഷ്ട്രയില് നിന്നുള്ള നേതാവ് ഹൃദയാഘാതത്തെ തുടര്ന്ന് അന്തരിച്ചു. ഭാരതപര്യടനം ലക്ഷ്യമിടുന്ന യാത്ര ഇന്ന് മഹാരാഷ്ട്രയില് പ്രവേശിച്ചിരുന്നു. ഇതിനിടെയാണ് നേതാക്കളെയും പ്രവര്ത്തകരെയും കണ്ണീരിലാഴ്ത്തി സേവാദള് ജനറല് സെക്രട്ടറി കൃഷ്ണകുമാര് പാണ്ഡെ മരിച്ചത്. യാത്രയ്ക്കിടെ കുഴഞ്ഞ് വീണാണ് മരണം സംഭവിച്ചത്.
സേവാദള് ജനറല് സെക്രട്ടറി കൃഷ്ണ കുമാര് പാണ്ഡെ കോണ്ഗ്രസിന്റെ മുതിര്ന്ന നേതാവ് ദിഗ്വിജയ സിംഗിനൊപ്പം നടക്കുകയായിരുന്നുവെന്നും, പെട്ടെന്ന് കുഴഞ്ഞ് വീണെന്നും പാര്ട്ടി നേതാവിന്റെ മരണത്തെക്കുറിച്ച് കോണ്ഗ്രസ് നേതാവ് ജയറാം രമേശ് പ്രതികരിച്ചു.
കന്യാകുമാരിയില് നിന്ന് ആരംഭിച്ച ഭാരത് ജോഡോ യാത്ര 12 സംസ്ഥാനങ്ങളിലൂടെയാണ് കടന്ന് പോകുന്നത്. 150 ദിവസം കൊണ്ട് ഏകദേശം 3,500 കിലോമീറ്ററാണ് യാത്ര കാല്നടയായി താണ്ടുന്നത്. തൊഴിലില്ലായ്മ, വിലക്കയറ്റം, വിദ്വേഷത്തിന്റെയും ഭിന്നിപ്പിന്റെയും രാഷ്ട്രീയം എന്നിവയ്ക്കെതിരെ മുദ്രാവാക്യം ഉയര്ത്തിയാണ് യാത്ര മുന്നേറുന്നത്.