ഞൊട്ട ഒടിച്ചാല്‍ എല്ലുകള്‍ തേയുമോ?

കൈ വിരലുകളുടെ ഞൊട്ട ഒടിയ്ക്കുന്നത് പലര്‍ക്കുമുള്ള ശീലമാണ്. വെറുതേയിരിയ്ക്കുമ്ബോഴോ അല്ലാത്തപ്പോഴോ യാദൃശ്ചികമായി ചെയ്യുന്ന ഒന്നാണ് വിരലിന്റെ ഞൊട്ടയൊടിയ്ക്കല്‍.
ഇത്തരത്തില്‍ ഞൊട്ടയൊടിയ്ക്കുമ്ബോള്‍ വിരല്‍ ഒടിയും എന്നെല്ലാം പറയുന്നവരുമുണ്ടാകും. വാസ്തവത്തില്‍ ഞൊട്ടയൊടിയ്ക്കുമ്ബോള്‍ എല്ലിനോ വിരലിനോ ദോഷം വരുമോ.
ശരീരത്തിലെ വിരല്‍ ഉള്‍പ്പെടെയുള്ള ജോയന്റുകള്‍ ചേരുന്നിടത്ത് ഒരു ഫ്ളൂയിഡ് കൂടിയുണ്ടാകും. ഇത് സൈനോവില്‍ ഫ്ളൂയിഡ് എന്നാണ് അറിയുന്നത്. ഇത് ജോയന്റുകളുടെ ആരോഗ്യത്തിന് പ്രധാനമാണ്. ഈ ഫ്ളൂയിഡുകളില്‍ പല വാതകങ്ങളും അടങ്ങിയിട്ടുണ്ട് നാം ഞൊട്ടയൊടിയ്ക്കുമ്ബോള്‍ ഈ ഫ്ളൂയിഡിലെ പ്രഷര്‍ കുറയുകയും ഇത് വായു കുമിളയായി മാറുകയും ചെയ്യുന്നു. ഇതാണ് ഞൊട്ടയൊടിയ്ക്കുമ്ബോഴുണ്ടാകുന്ന ശബ്ദമായി കേള്‍ക്കുന്നത്. ഈ കുമിള വീണ്ടും ആ ഫ്ളൂയിഡിലേയ്ക്ക് അലിഞ്ഞു ചേരാൻ ഏതാണ്ട് 20 മിനിറ്റെടുക്കും. ഇതിനാല്‍ ഇത്രയും സമയം വീണ്ടും ഞൊട്ടയൊടിച്ചാല്‍ ശബ്ദമുണ്ടാകില്ല. ഇത് അലിഞ്ഞു ചേര്‍ന്നാല്‍ വീണ്ടും ശബ്ദമുണ്ടാകും. ഇത്തരം ഫ്ളൂയിഡ് ഉള്ളിടത്തെല്ലാം ഈ ശബ്ദം കേള്‍ക്കാം. ഷോള്‍ഡറിലും കഴുത്ത് തിരിയ്ക്കുമ്ബോഴുമെല്ലാം ചിലപ്പോള്‍ ഈ ശബ്ദം കേള്‍ക്കുന്നതിന്റെ കാരണം ഇതാണ്.
എല്ലുതേയ്മാനം
ഇത്തരം ശബ്ദം എല്ലുതേയ്മാനമുണ്ടാക്കുമോയെന്ന ഭയം പലര്‍ക്കുമുണ്ട്. ഇത്തരം സംശയം പലര്‍ക്കുമുണ്ട്. ഇതിനാല്‍ 50 വര്‍ഷമെടുത്ത് അമേരിക്കയിലെ ഡോണാള്‍ഡ് എന്ന ഡോക്ടര്‍ ഇതെക്കുറിച്ച്‌ പഠനം നടത്തി. അദ്ദേഹത്തിന്റെ ഇടതു കയ്യില്‍ അദ്ദേഹം തുടര്‍ച്ചയായി ഞൊട്ടയൊടിച്ചു. 365000 തവണ അദ്ദേഹം ഇതുപോലെ ഞൊട്ടയൊടിച്ചു. അതേ സമയം വലതു കയ്യില്‍ ഇത് ചെയ്തില്ല. ഈ വര്‍ഷങ്ങള്‍ക്ക് ശേഷം അദ്ദേഹം റിപ്പോര്‍ട്ടും നല്‍കി. രണ്ടു കൈകളിലേയും എല്ലുകള്‍ ഒരേ പോലെയാണ്. അതായത് ഞൊട്ടയൊടിച്ചത് കൊണ്ട് പ്രത്യേകിച്ച്‌ ഒരു മാറ്റവും എല്ലുകള്‍ക്ക് സംഭവിച്ചിട്ടില്ല.
സന്ധിതേയ്മാനം
അതേ സമയം നമ്മുടെ സന്ധികളിലും മറ്റും തുടര്‍ച്ചയായി കേള്‍ക്കുന്ന ചില ശബ്ദങ്ങള്‍, ഉദാഹരണത്തിന് നാം പടികള്‍ കയറുമ്ബോള്‍ കാല്‍മുട്ടിലുണ്ടാകുന്ന ചില ശബ്ദങ്ങളും മറ്റും എല്ലുതേയ്മാനം സംഭവിയ്ക്കുന്നതിന്റെ നേരത്തെയുള്ള ലക്ഷണങ്ങളായി എടുക്കാമെന്നും റിപ്പോര്‍ട്ടുകളുണ്ട്. ഇതു പോലെ കഴുത്ത് തിരിയ്ക്കുമ്ബോള്‍ കേള്‍ക്കുന്ന ശബ്ദം, നട്ടെല്ലില്‍ കേള്‍ക്കുന്ന ശബ്ദം, കാല്‍മുട്ടുകളില്‍ തുര്‍ച്ചയായി കേള്‍ക്കുന്ന ശബ്ദം എല്ലാം സന്ധിതേയ്മാനം സംഭവിയ്ക്കുന്നതിന്റെ സാധ്യത കൂടിയാണെന്ന് പറയാം. അതായത് വലിയ ഭാരം താങ്ങുന്ന സന്ധിഭാഗങ്ങളില്‍ വരുന്ന ശബ്ദം.
വേദനയുണ്ടാകുന്നുവെങ്കില്‍
അതേ സമയം ഞൊട്ടയൊടിയ്ക്കുമ്ബോള്‍ ശബ്ദം കേള്‍ക്കുന്നതിന് പകരം വേദനയുണ്ടാകുന്നുവെങ്കില്‍, ഇതുപോലെ ഞൊട്ടയൊടിയ്ക്കുമ്ബോള്‍ വേദന കൂടുതലായി ഉണ്ടെങ്കില്‍ ഇത് റ്യുമാറ്റോയ്ഡ് ആര്‍ത്രൈറ്റിസ് പോലുള്ള രോഗങ്ങളുടെ സൂചന കൂടിയാകാം. ഇതിനാല്‍ ഇത് ചെയ്യാതിരിയ്ക്കുന്നതാണ് നല്ലത്. ഇത്തരക്കാര്‍ ഞൊട്ടയൊടിയ്ക്കുമ്ബോള്‍ വീക്കം കൂടുകയും ഇത് സന്ധികള്‍ക്ക് ദോഷം വരുത്തുകയും ചെയ്യുന്നു.