![“Manju”](https://santhigirinews.org/wp-content/uploads/2020/04/YOUTUBE.jpg")
പാലക്കാട് : പൊതുജനങ്ങള്‍ക്കായി വാട്ടര്‍ എ.ടി.എം സ്ഥാപിച്ച് പരുതൂര്‍ ഗ്രാമപഞ്ചായത്ത്. പട്ടാമ്പി ബ്ലോക്ക് പഞ്ചായത്തിന്റെ 2023-24 വാര്‍ഷിക പദ്ധതിയില്‍ ഉള്‍പ്പെടുത്തി അഞ്ച് ലക്ഷം രൂപ ചെലവില്‍ ഗ്രാമപഞ്ചായത്ത് ഓഫീസിന് മുന്നിലാണ് വാട്ടര്‍ എ.ടി.എം സ്ഥാപിച്ചത്. പഞ്ചായത്തില്‍ വിവിധ സേവനങ്ങള്‍ക്കായി എത്തുന്നവര്‍, വഴിയാത്രക്കാര്‍, വിദ്യാര്‍ത്ഥികള്‍ ഉള്‍പ്പെടെ നൂറിലധികം പേര്‍ക്ക് വാട്ടര്‍ എ.ടി.എം ഉപകാരപ്രദമാകും. വാട്ടര്‍ എ.ടി.എം മുഖേനെ സാധാരണ വെള്ളം, ചൂട് വെള്ളം, തണുത്ത വെള്ളം എന്നിവ ലഭിക്കും. ഇതില്‍ സാധാരണ വെള്ളം സൗജന്യമായും ചൂട്, തണുത്ത വെള്ളം ലിറ്ററിന് ഒരു രൂപ നിരക്കിലുമാണ് ലഭിക്കുക. ഇതിനായി ഒരു രൂപ നാണയം വാട്ടര്‍ എ.ടി.എമ്മില്‍ നിക്ഷേപിച്ചാല്‍ മതി. 2023-24 വാര്‍ഷിക പദ്ധതിയില്‍ ഉള്‍പ്പെടുത്തി പള്ളിപ്പുറം കുടുംബാരോഗ്യ കേന്ദ്രത്തിലും വെള്ളിയാങ്കല്ല് പാര്‍ക്കിനു സമീപത്തും അടുത്തമാസം വാട്ടര്‍ എ.ടി.എം സ്ഥാപിക്കാനുള്ള തയ്യാറെടുപ്പിലാണ് ഗ്രാമപഞ്ചായത്ത് ഭരണസമിതി.
പരുതൂര്‍ ഗ്രാമപഞ്ചായത്ത് ഓഫീസിന് മുന്നില്‍ സ്ഥാപിച്ച വാട്ടര്‍ എ.ടി.എം പട്ടാമ്പി ബ്ലോക്ക് പഞ്ചായത്ത് പ്രസിഡന്റ് ഗീത മണികണ്ഠന്‍ ഉദ്ഘാടനം ചെയ്തു. പരുതൂര്‍ ഗ്രാമപഞ്ചായത്ത് പ്രസിഡന്റ് എ.പി.എം. സക്കരിയ അധ്യക്ഷനായ പരിപാടിയില്‍ പട്ടാമ്പി ബ്ലോക്ക് പഞ്ചായത്ത് ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ഷൈമ ഉണ്ണികൃഷ്ണന്‍, ഗ്രാമപഞ്ചായത്ത് വൈസ് പ്രസിഡന്റ് നിഷിത ദാസ്, ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ അഭി എടമന, ബ്ലോക്ക് മെമ്പര്‍മാരായ പി.ടി.എം ഫിറോസ്, എ.കെ.എം അലി, രജനി ചന്ദ്രന്‍, ബി.ഡി.ഒ സരിത, രാമദാസ് പരുതൂര്‍ തുടങ്ങിയവര്‍ പങ്കെടുത്തു.
