തിരുവനന്തപുരം: കോണ്ഗ്രസ് വിട്ട് ബിജെപിയില് ചേരാനൊരുങ്ങുന്ന പത്്മജ വേണുഗോപാലിനെതിരെ രൂക്ഷ വിമര്ശനവുമായി യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില്. ഇപ്പോള് കേരള സമൂഹം പത്മജയെ വിശേഷിപ്പിക്കുന്നത് എന്താണ്. തന്തയ്ക്ക് പിറന്ന മകള് എന്നാണോ, തന്തയെ കൊന്ന സന്താനം എന്നാണോ എന്ന് രാഹുല് ചോദിച്ചു. പത്മജയെ കൊണ്ട് ബിജെപിക്ക് കിട്ടാന് പോകുന്നത് ആകെ ഒരുവോട്ട് മാത്രമായിരിക്കുമെന്ന് പറഞ്ഞ രാഹുല് കെ കരുണാകരന് എന്ത് പാതകം ആണ് പത്മജയോട് ചെയ്തതെന്നും ചോദിച്ചു.
കോണ്ഗ്രസ് വിട്ട് ബിജെപിയില് ചേരാനൊരുങ്ങുന്ന പത്മജ വേണുഗോപാലിനെ നിശിതമായി വിമര്ശിച്ച് സഹോദരനും കോണ്ഗ്രസ് നേതാവുമായ കെ മുരളീധരന് എംപി രംഗത്തെത്തി. കോണ്ഗ്രസ് പാര്ട്ടി പത്മജയ്ക്ക് നല്കിയത് മുന്തിയ പരിഗണനയാണ്. പത്മജയുടെ തീരുമാനം ദൗര്ഭാഗ്യകരമാണെന്നും അദ്ദേഹം പറഞ്ഞു.
പത്മജയെ എടുത്തതുകൊണ്ട് കാല് കാശിന്റെ ഗുണം ബിജെപിക്ക് കിട്ടില്ല. ഈ ചതിക്ക് തെരഞ്ഞെടുപ്പിലൂടെ പകരം ചോദിക്കും. ‘കെ കരുണാകരനെ ചിതയിലേക്ക് എടുത്തപ്പോള് പുതപ്പിച്ച ത്രിവര്ണ പതാക ഞങ്ങള്ക്കുള്ളതാണ്’. കഷ്ടപ്പാട് അനുഭവിക്കാത്ത മക്കള്ക്ക് ഇത്തരം ദുഷ്ടബുദ്ധി തോന്നാം. വര്ക്ക് അറ്റ് ഹോം നടത്തുന്ന നേതാക്കള്ക്ക് ഇത്രയും സ്ഥാനം കൊടുത്താല് പോരേയെന്ന് മുരളീധരന് ചോദിച്ചു.
പത്മജയുടെ ബിജെപി പ്രവേശനത്തെ പരിഹസിച്ച് സിപിഐഎം നേതാവ് പി ജയരാജന് എത്തി. പെങ്ങള് പോയി കണ്ട് സെറ്റായാല് പിന്നാലെ ആങ്ങളയും പോകുമെന്ന് ജയരാജന് ഫേസ്ബുക്കില് കുറിച്ചു. എല്ലാം ഗുരുവായുരപ്പന്റെയും ലീഡറുടെയും അനുഗ്രഹത്തിനായി സമര്പ്പിക്കുന്നുവെന്നും പത്മജയുടെ പോക്കിനെക്കുറിച്ച് ഉന്നത നേതൃത്വം പ്രതികരിക്കുമെന്നുമാണ് തൃശൂരിലെ സ്ഥാനാര്ത്ഥി ടി എന് പ്രതാപന് പ്രതികരിച്ചു.
മുന് മുഖ്യമന്ത്രിയും കോണ്ഗ്രസ് നേതാവുമായിരുന്ന ലീഡര് കെ.കരുണാകരന്റെ മകളുടെ ബിജെപി പ്രവേശനം കോണ്ഗ്രസിന് വലിയ തിരിച്ചടിയാണ് ഉണ്ടാക്കിയിരിക്കുന്നത്. തുടര്ച്ചയായി കോണ്ഗ്രസ് പാര്ട്ടി നേതൃത്വത്തിന്റെ ഭാഗത്ത് നിന്നും ഉണ്ടായ അവഗണനയും കോണ്ഗ്രസ് നിലപാടുകളില് വന്ന മാറ്റവുമാണ് പത്മജ വേണുഗോപാലിനെ ബിജെപിയുടെ പാതയിലേയ്ക്ക് എത്തിച്ചതെന്നാണ് വിവരം.