ഗോപാല്‍പൂര്‍ തുറമുഖവും അദാനി ഗ്രൂപ്പിന്

അഹമ്മദാബാദ്: ഇന്ത്യയിലെ ഏറ്റവും വലിയ തുറമുഖ, ലോജിസ്റ്റിക്സ് കമ്പനിയായ അദാനി പോർട്ട്സ് ആൻഡ് സ്പെഷ്യല്‍ ഇക്കണോമിക് സോണ്‍ ലിമിറ്റഡ് (APSEZ) എസ്പി ഗ്രൂപ്പിന്റെ 56% ഓഹരികളും ഒറീസ സ്റ്റീവ്ഡോർസ് ലിമിറ്റഡിന്റെ (OSL) 39% ഓഹരികളും വാങ്ങാൻ കരാറില്‍ ഒപ്പിട്ടു. ഗോപാല്‍പൂർ പോർട്ട് ലിമിറ്റഡില്‍ (GPL) എൻറർപ്രൈസ് മൂല്യമായ 3,080 കോടി രൂപയിലാണ് ഏറ്റെടുക്കല്‍ നടക്കുന്നത്.

ഇന്ത്യയുടെ കിഴക്കൻ തീരത്ത് സ്ഥിതി ചെയ്യുന്ന ഗോപാല്‍പൂർ തുറമുഖത്തിന് 20 MMTPA കൈകാര്യം ചെയ്യാനുള്ള ശേഷിയുണ്ട്. മള്‍ട്ടി-കാർഗോ തുറമുഖം എന്ന നിലയില്‍, ഇരുമ്പയിര്, കല്‍ക്കരി, ചുണ്ണാമ്പുകല്ല്, ഇല്‍മനൈറ്റ് എന്നിവയുള്‍പ്പെടെയുള്ള ഡ്രൈ ബള്‍ക്ക് കാർഗോയുടെ വൈവിധ്യമാർന്ന മിശ്രിതമാണ് ഗോപാല്‍പൂർ കൈകാര്യം ചെയ്യുന്നത്.

ഇരുമ്പ്, ഉരുക്ക്, അലുമിനിയം തുടങ്ങിയ ധാതു അധിഷ്ഠിത വ്യവസായങ്ങളുടെ വളർച്ചയെ പിന്തുണയ്ക്കുന്നതില്‍ തുറമുഖം ഒരു പ്രധാന പങ്ക് വഹിക്കുന്നു. വിപണിയിലെ ആവശ്യാനുസരണം തുറമുഖം രൂപകല്പന ചെയ്യുന്നതിനും വികസിപ്പിക്കുന്നതിനും സൗകര്യമുണ്ട്. വികസനത്തിനായി 500 ഏക്കറിലധികം ഭൂമി പാട്ടത്തിന് GPLന് ലഭിച്ചിട്ടുണ്ട്.

ഗോപാല്‍പൂർ തുറമുഖം ഏറ്റെടുക്കുന്നതിലൂടെ ഉപഭോക്താക്കള്‍ക്ക് മികച്ച സേവനം നല്‍കാൻ സഹായിക്കുമെന്ന് APSEZ മാനേജിംഗ് ഡയറക്ടർ കരണ്‍ അദാനി പറഞ്ഞു. GPL അദാനി ഗ്രൂപ്പിന്റെ പാൻ-ഇന്ത്യ പോർട്ട് നെറ്റ്‌വർക്കിലേക്ക് ചേർക്കുന്നതോടെ മൊത്തത്തിലുള്ള ചരക്ക് ശേഷി ഗണ്യമായി വർദ്ധിപ്പിക്കുകയും APSEZ ന്റെ സംയോജിത ലോജിസ്റ്റിക് സമീപനത്തെ ശക്തിപ്പെടുത്തുകയും ചെയ്യുമെന്നും അദ്ദേഹം പറഞ്ഞു.