വിധിയെഴുതി കേരളം; സംസ്ഥാനത്ത് വോട്ടെടുപ്പ് പൂര്‍ത്തിയായി

തിരുവനന്തപുരം: ലോക്‌സഭാ തിരഞ്ഞെടുപ്പില്‍ 20 മണ്ഡലങ്ങളിലെയും വിധിയെഴുതി കേരളം. നിശ്ചിത സമയ പരിധിയും കഴിഞ്ഞ് നാലര മണിക്കൂറിലേറെ പിന്നിട്ട് കഴിഞ്ഞപ്പോഴാണ് സംസ്ഥാനത്ത് വോട്ടെടുപ്പ് പൂര്‍ത്തിയായത്. 70.35 % പോളിങ്ങാണ് സംസ്ഥാനത്ത് രേഖപ്പെടുത്തിയത്. അന്തിമ കണക്കു വരുമ്പോള്‍ ഇത് ഉയരുമെന്നാണ് പ്രതീക്ഷ.

വടകര ലോക്സഭാ മണ്ഡലത്തിലെ കുറ്റ്യാടിയില്‍ 141-ാം ബൂത്തിലാണ് ഏറ്റവും ഒടുവില്‍ വോട്ടെടുപ്പ് അവസാനിച്ചത്. 11.43നാണ് അവസാനത്തെ ആള്‍ വോട്ട് രേഖപ്പെടുത്തിയത്. പതിനൊന്ന് മണ്ഡലങ്ങളില്‍ 70 ശതമാനം പോളിങ് കടന്നു. കോഴിക്കോട് ജില്ലയിലെ 281 ബൂത്തുകളില്‍ വോട്ടെടുപ്പ് കഴിഞ്ഞത് രാത്രി പത്തരയോടെയാണ്.

ഏറ്റവും കൂടുതല്‍ പോളിങ് കണ്ണൂരിലാണ് (75.74%). ഏറ്റവും കുറവ് പത്തനംതിട്ടയി(63.35%)ലുമാണ്. പതിനൊന്ന് മണ്ഡലങ്ങളില്‍ പോളിങ് ശതമാനം 70 കടന്നു. തിരുവനന്തപുരം 66.43%, ആറ്റിങ്ങല്‍ 69.40%, കൊല്ലം 67.92%, പത്തനംതിട്ട 63.65%, മാവേലിക്കര 65.88%, ആലപ്പുഴ 74.37%, കോട്ടയം 65.59%, ഇടുക്കി 66.39%, എറണാകുളം 68.10%, ചാലക്കുടി 71.68%, തൃശൂര്‍ 72.11%, പാലക്കാട് 72.68%, ആലത്തൂര്‍ 72.66%, പൊന്നാനി 67.93%, മലപ്പുറം 71.68%, കോഴിക്കോട് 73.34 %, വയനാട് 72.85%, വടകര 73.36%, കണ്ണൂര്‍ 75.74%, കാസര്‍ഗോഡ് 74.28% എന്നിങ്ങനെയാണ് മണ്ഡലങ്ങളിലെ പോളിങ് ശതമാനം.