ഫ്ലോയ്ഡിന്റെ മരണത്തില് പ്രതിഷേധം കത്തുന്നു
വാഷിംഗ്ടണ് ഡിസി: കറുത്തവര്ഗക്കാരന് ജോര്ജ് ഫ്ലോയ്ഡിന്റെ മരണത്തില് യുഎസില് പ്രതിഷേധം കത്തുന്നു. ഇതോടെ പ്രധാന നഗരങ്ങളിലെല്ലാം ശനിയാഴ്ച പോലീസ് കര്ഫ്യൂ പ്രഖ്യാപിച്ചു. പ്രതിഷേധം അടിച്ചമര്ത്തുമെന്ന് പ്രസിഡന്റ് ഡോണാള്ഡ് ട്രംപിന്റെ മുന്നറിയിപ്പ് അവഗണിച്ച് ആയിരക്കണക്കിന് പ്രതിഷേധക്കാരാണ് തെരവുകളില് ഇറങ്ങിയത്.
പ്രതിഷേധത്തിന്റെ പ്രഭവകേന്ദ്രമായ മിനിയാപോളീസ് നഗരത്തില് തുടര്ച്ചയായ അഞ്ചാം രാത്രിയും പോലീസും പ്രതിഷേധക്കാരും ഏറ്റുമുട്ടി. പ്രതിഷേധക്കാര്ക്ക് നേരെ പോലീസ് ഗ്രനേഡും കണ്ണീര് വാതകവും പ്രയോഗിച്ചു. ഫ്ലോയ്ഡ് അവസാനം പറഞ്ഞ ‘എനിക്കു ശ്വാസം മുട്ടുന്നു’ എന്ന വാക്കുകള് ഉയര്ത്തിയാണ് പ്രതിഷേധം.
ലോസ് ഏഞ്ചല്സ്, ചിക്കാഗോ, അറ്റ്ലാന്റ തുടങ്ങി ഇരുപത്തിനാലോളം നഗരങ്ങളില് കര്ഫ്യൂ പ്രഖ്യാപിച്ചിട്ടുണ്ട്. ഇതുവരെ അമേരിക്ക കാണാത്ത കലാപം നിയന്ത്രിക്കാന് കൂടുതല് നഗരങ്ങള് സൈന്യത്തിന്റെ സഹായം തേടി. കൊലപാതകിയായ പോലീസുകാരനെതിരെ ശക്തമായ വകുപ്പുകള് ചേര്ത്ത് കേസെടുക്കണമെന്നും കൂടുതല് അറസ്റ്റ് ഉണ്ടാകണമെന്നും ആവശ്യപ്പെട്ട് ആയിരക്കണക്കിന് പ്രതിഷേധക്കാര് സിയാറ്റില് മുതല് ന്യൂയോര്ക്ക് വരെ തെരുവിലിറങ്ങി. നിരവധി വാഹനങ്ങള് അഗ്നിക്കിരയാക്കപ്പെട്ടു. അക്രമികള് കടകള് കൊള്ളയടിച്ചതായും റിപ്പോര്ട്ടുണ്ട്.
മിനിസോട്ട സംസ്ഥാനത്തെ മിനിയാപോളീസ് നഗരത്തില് വ്യാജനോട്ട് മാറാന് ശ്രമിച്ചെന്നാരോപിച്ച് കസ്റ്റഡിയിലെടുത്ത ഫ്ളോയ്ഡിനെ വെള്ളക്കാരനായ പോലീ സുകാരന് ഡെറക് ഷോവിന് കൊലപ്പെടുത്തിത്. കൈയാമം വച്ച നിലയില് നിലത്തു കിടക്കുന്ന ഫ്ളോയിഡിന്റെ കഴുത്തില് ഷോവിന് മുട്ടുകുത്തി ശ്വാസംമുട്ടിച്ചാണ് കൊലപ്പെടുത്തിയത്. ഇതിന്റെ വീഡിയോ പുറത്തുവന്നിട്ടുണ്ട്.