ലൈഫ് മിഷന് പദ്ധതി: വിട്ടുപോയ ഗുണഭോക്താക്കള്ക്ക് ഇന്നുമുതല് അപേക്ഷിക്കാം
സിന്ധുമോള് ആര്
തിരുവനന്തപുരം: ലൈഫ് മിഷന് പദ്ധതിയുടെ ഗുണഭോക്തൃ പട്ടികയില് നിന്നും വിട്ടുപോയ അര്ഹരായ ഗുണഭോക്താക്കളെ ഉള്പ്പെടുത്തുന്നതുമായി ബന്ധപ്പെട്ട് സംസ്ഥാന സര്ക്കാര് വിശദമായ മാര്ഗരേഖ പുറപ്പെടുവിച്ചു. ഇന്നു മുതല് 14 വരെ അപേക്ഷ സമര്പ്പിക്കാം.
www.life2020.ker ala.gov.in എന്ന വെബ്സൈറ്റിലൂടെ പൂര്ണമായും സോഫ്റ്റ്വേര് അധിഷ്ഠിതമായ സംവിധാനത്തിലൂടെയാണ് അപേക്ഷിക്കേണ്ടത്. പഞ്ചായത്ത് ഹെല്പ് ഡസ്ക്കുകള്, അക്ഷയ കേന്ദ്രങ്ങള്, മറ്റ് ഇന്റര്നെറ്റ് സേവനദാതാക്കള് എന്നിവരിലുടെയോ, ഇന്റര്നെറ്റ് ഉപയോഗിച്ച് സ്വന്തമായോ വെബ്സൈറ്റ് വഴി ഗുണഭോക്താക്കള്ക്ക് അപേക്ഷിക്കാം. അക്ഷയ കേന്ദ്രങ്ങള് വഴിയാണ് അപേക്ഷിക്കുന്നതെങ്കില് അപേക്ഷാ ഫീസ് ആയി 40 രൂപ ഈടാക്കും. ബന്ധപ്പെട്ട തദ്ദേശ സ്ഥാപനത്തിലേക്കാണ് ഈ അപേക്ഷകള് ഓണ്ലൈനായി എത്തുന്നത്.
നിലവില് വീട് ഇല്ലാത്തവരും സ്വന്തമായി വീട് നിര്മിക്കാന് ശേഷിയില്ലാത്തവരുമായ കുടുംബങ്ങളെ മാത്രമാണ് ലൈഫ് മിഷനിലൂടെ പരിഗണിക്കുന്നത്. മാര്ഗരേഖയില് പരാമര്ശിക്കുന്ന ഏഴ് അര്ഹതാ മാനദണ്ഡങ്ങള് പരിശോധിച്ച് നിങ്ങളുടെ കുടുംബത്തിന് അപേക്ഷിക്കാന് യോഗ്യതയുണ്ടെന്ന് ഉറപ്പാക്കിയിട്ടേ അപേക്ഷ സമര്പ്പിക്കാവൂ. ഒരു റേഷന് കാര്ഡിലെങ്കിലും പ്രത്യേകം കുടുംബമായി കഴിയുന്ന പട്ടികജാതി / പട്ടികവര്ഗ / ഫിഷറീസ് കുടുംബങ്ങള്ക്കും ഈ വിഭാഗങ്ങളില് 25 സെന്റില് കൂടുതല് ഭൂമിയുള്ളവര്ക്കും മറ്റ് അര്ഹതകള് ഉണ്ടെങ്കില് അപേക്ഷ സമര്പ്പിക്കാം. അതുപോലെതന്നെ ജീര്ണിച്ച വീടുകള് ഒരു കാരണവശാലും വാസയോഗ്യമല്ലങ്കില് മാത്രമേ അപേക്ഷ സമര്പ്പിക്കാവൂ.
അപേക്ഷയോടൊപ്പം റേഷന് കാര്ഡ്, ആധാര് കാര്ഡ്, വില്ലേജ് ഓഫീസറില് നിന്നുമുള്ള വരുമാന സര്ട്ടിഫിക്കറ്റ്, ഭൂരഹിത കുടുംബങ്ങള് ഭൂമിയില്ല എന്ന് കാണിക്കുന്ന വില്ലേജ് ഓഫീസറില് നിന്നുമുള്ള സര്ട്ടിഫിക്കറ്റ്, മുന്ഗണന തെളിയിക്കുന്ന സര്ട്ടിഫിക്കറ്റുകള് എന്നീ രേഖകള് സമര്പ്പിക്കണം.
14 കഴിഞ്ഞാല് ഒരു കാരണവശാലും അപേക്ഷ സമര്പ്പിക്കുവാന് സാധിക്കില്ല. അതുകൊണ്ടു തന്നെ അതിന് മുന്പായി എല്ലാ അര്ഹരായ ഗുണഭോക്താക്കളും അപേക്ഷകള് സമര്പ്പിച്ചു എന്ന് തദ്ദേശസ്വയംഭരണ സ്ഥാപനങ്ങള് ഉറപ്പാക്കണം. ഒണ്ലൈന് വഴിയല്ലാതെ അപേക്ഷകള് സ്വീകരിക്കരുത്. അവസാന തീയതി കഴിഞ്ഞാല് അപേക്ഷകരുടെ ലിസ്റ്റ് തദ്ദേശസ്വയംഭരണ സ്ഥാപനങ്ങളില് പ്രസിദ്ധീകരിക്കണം.
അപേക്ഷകളുടെ സൂക്ഷ്മ പരിശോധനക്കായി തദ്ദേശസ്വയംഭരണ സ്ഥാപനങ്ങളിലേയും ഘടക സ്ഥാപനങ്ങളിലേയും ഉദ്യേഗസ്ഥരെ അപേക്ഷകളുടെ എണ്ണത്തിനനുസരിച്ച് ചുമതലപ്പെടുത്തി കോവിഡ് മാനദണ്ഡങ്ങള് പാലിച്ച് ഫീല്ഡ് പരിശോധന നടത്തി ഓണ്ലൈനായി പരിശോധനാ റിപ്പോര്ട്ട് സമര്പ്പിക്കണം. അനര്ഹര് കരട് ലിസ്റ്റില് ഉള്പ്പെട്ടാല് അന്വേഷണ ഉദ്യേഗസ്ഥനാകും ബാധ്യത. ലൈഫ് മിഷന്റെ രണ്ടും മൂന്നും ഘട്ടങ്ങളില് അര്ഹരായിട്ടും ഇതുവരെ സഹായം ലഭിക്കാത്തവര് വീണ്ടും അപേക്ഷിക്കേണ്ടതില്ല.
ഗ്രാമപഞ്ചായത്ത് തലത്തിലുള്ള പരാതികള് ബ്ലോക്ക് പഞ്ചായത്ത് സെക്രട്ടറിക്കും നഗരസഭകളിലെ പരാതികള് അതത് നഗരസഭാ സെക്രട്ടറിമാര്ക്കുമാണ് സമര്പ്പിക്കേണ്ടത്. പട്ടിക സംബന്ധിച്ച രണ്ടാം അപ്പീലുകള് അതത് ജില്ലാ കളക്ടര്മാരായിരിക്കും പരിശോധിക്കുക.
സെപ്റ്റംബര് 26 നകം തദ്ദേശസ്വയംഭരണ സ്ഥാപനതല അംഗീകാരവും ഗ്രാമസഭാ അംഗീകാരവും വാങ്ങി സെപ്റ്റംബര് 30ന് പട്ടിക അന്തിമമാക്കുന്നതിനുമാണ് ഇപ്പോള് തീരുമാനം