സ്പേസ് എക്സ് ദൗത്യം പൂര്ണതയിലേക്ക്
ശ്രീജ.എസ്
ഫ്ളോറിഡ: ആദ്യ സ്വകാര്യ ബഹിരാകാശ സ്പേസ് എക്സ് ദൗത്യം പൂര്ണതയിലേക്ക്. സ്പേസ് എക്സ് കമ്ബനിയുടെ ക്രൂഡ്രാഗണ് പേടകം അന്താരാഷ്ട്ര ബഹിരാകാശ നിലയത്തില് നിന്ന് നാസയുടെ രണ്ട് സഞ്ചാരികളുമായി ഭൂമിയിലേക്ക് പുറപ്പെട്ടു.
ഞായറാഴ്ച ഉച്ചയോടെ ഫ്ലോറിഡ തീരത്തിന് സമീപം കടലിലാണ് പേടകം ലാന്ഡ് ചെയ്യുക. റോബര്ട്ട് ബെന്കെന്, ഡഗ്ലസ് ഹര്ലി എന്നിവരാണ് സ്പേസ് എക്സ് ദൗത്യത്തിലെ ആദ്യ സഞ്ചാരികള്. ബഹിരാകാശ നിലയത്തില്നിന്ന് ക്രൂഡ്രാഗണ് പേടകം അകന്നു പോകുന്ന ചിത്രം നാസ ട്വീറ്റ് ചെയ്തിട്ടുണ്ട്. ഭൂമിയെ ലക്ഷ്യമാക്കിയുള്ള പേടകം സുരക്ഷിതമായ പാതയിലാണെന്നും നാസ അറിയിച്ചു. മേയ് 30നാണ് സ്വകാര്യ ബഹിരാകാശ ദൗത്യം സ്പേസ് എക്സ് അന്താരാഷ്ട്ര ബഹിരാകാശ നിലയത്തിലേക്ക് പുറപ്പെട്ടത്. ഒമ്പതു വര്ഷത്തിനു ശേഷമാണ് നാസ പുതിയ ദൗത്യം നടത്തിയത്.