ശ്രീജ.എസ്
തിരുവനന്തപുരം: സംസ്ഥാനത്ത് കോവിഡ്-19 വൈറസ് വ്യാപനത്തിന്റെ പശ്ചാത്തലത്തില് കണ്ടെയിന്റ്മെന്റ് സോണുകളിലെ വോട്ടര്മാര്ക്ക് ഹിയറിംഗിന് ഓണ്ലൈന് സൗകര്യം ഏര്പ്പെടുത്തുന്നത് സംബന്ധിച്ച് ഇലക്ടറല് രജിസ്ട്രേഷന് ഓഫീസര്മാര്ക്ക് നിര്ദ്ദേശം നല്കിയതായി സംസ്ഥാന തിരഞ്ഞെടുപ്പ് കമ്മീഷണര് വി.ഭാസ്കരന് അറിയിച്ചു.
വോട്ടര് പട്ടികയില് പേര് ചേര്ക്കുന്നതിനുളള ഹിയറിംഗിന് നേരിട്ട് ഹാജരാകാന് കഴിയാത്ത സാഹചര്യത്തില് അപേക്ഷയുടെ പ്രിന്റൗട്ടില് ഒപ്പും ഫോട്ടോയും പതിച്ച് അവ സ്കാന് ചെയ്ത് ഇലക്ടറല് രജിസ്ട്രേഷന് ഓഫീസര്മാര്ക്ക് ഇ-മെയില് ആയി അയയ്ക്കാവുന്നതും ഓണ്ലൈന് വഴിയോ മൊബൈല് ഫോണ് വീഡിയോകോള് വഴിയോ ഹിയറിംഗ് നടത്താവുന്നതുമാണ്.
പ്രവാസികള്ക്ക് വോട്ടര് പട്ടികയില് പേര് ചേര്ക്കുന്നതിന് സമര്പ്പിക്കുന്ന ഓണ്ലൈന് അപേക്ഷയുടെ പ്രിന്റൗട്ടില് ഒപ്പും ഫോട്ടോയും പതിച്ച് പാസ്പോര്ട്ടിന്റെ ബന്ധപ്പെട്ട പേജുകള് സഹിതം സ്കാന് ചെയ്ത് അതാത് ഇലക്ടറല് രജിസ്ട്രേഷന് ഓഫീസര്മാര്ക്ക് ഇ-മെയില് ആയി അയയ്ക്കാം. വോട്ടര് പട്ടിക സംബന്ധിച്ച് ആക്ഷേപം ഉന്നയിക്കുന്നവര്ക്ക് ഓണ്ലൈന് വഴിയോ മൊബൈല് ഫോണ് വീഡിയോ കോള് വഴിയോ ഹിയറിംഗ് നടത്തുന്നതിനുളള സാങ്കേതിക സൗകര്യം ഉപയോഗിക്കാം.