![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
ന്യൂഡല്‍ഹി: ഇന്ത്യയില്‍ കോവിഡ് ബാധിതരുടെ എണ്ണം 25 ലക്ഷത്തിലേക്കടുക്കുന്നു. പ്രതിദിന കോവിഡ് ബാധിതരുടെ എണ്ണത്തില്‍ തുടര്‍ച്ചയായ വര്‍ദ്ധനവാണുള്ളത്. കഴിഞ്ഞ 24 മണിക്കൂറിനുള്ളില്‍ 64,553 പേര്‍ക്കാണ് വൈറസ് ബാധ സ്ഥിരീകരിച്ചത്. ഇതോടെ രാജ്യത്തെ കോവിഡ്ബാധിതരുടെ എണ്ണം 24,61,191 ആയി ഉയര്‍ന്നു. കഴിഞ്ഞ 24 മണിക്കൂറിനുള്ളില്‍ ആയിരത്തിലേറെ കോവിഡ് മരണങ്ങളും റിപ്പോര്‍ട്ട് ചെയ്തു. കേന്ദ്ര ആരോഗ്യ കുടുംബക്ഷേമ മന്ത്രാലയത്തിന്റെ ഔദ്യോഗിക കണക്കുകള്‍ പ്രകാരം 1007 മരണമാണ് കഴിഞ്ഞ ദിവസം രേഖപ്പെടുത്തിയത്. ഇതോടെ കോവിഡ് രോഗബാധയെ തുടര്‍ന്ന് മരിച്ചവരുടെ എണ്ണം 48,040 ആയി. ആരോഗ്യമന്ത്രാലയത്തിന്റെ റിപ്പോര്‍ട്ട് പ്രകാരം രാജ്യത്തെ മരണനിരക്ക് 1.95 ശതമാനമാണ്.
രാജ്യത്ത് ഇതുവരെ 17,51,555 പേര്‍ രോഗമുക്തി നേടി. കഴിഞ്ഞ ദിവസം 55573 പേര്‍ ആശുപത്രിവിട്ടു. രാജ്യത്തെ കോവിഡ് രോഗമുക്തി നിരക്ക് 71.17 ശതമാനമായി ഉയര്‍ന്നുവെന്ന് ആരോഗ്യമന്ത്രാലയം അറിയിച്ചു. നിലവിലുള്ള കോവിഡ് രോഗികളുടെ നിരക്ക് 26.88 ശതമാനമായി. 6,61,595 പേരാണ് ചികിത്സയില്‍ കഴിയുന്നത്. പ്രതിദിന കോവിഡ് രോഗികളുടെ കണക്കില്‍ ഇന്ത്യയാണ് ഒന്നാംസ്ഥാനത്തുള്ളത്. ആഗസ്റ്റ് 13ന് 8,48,728 സാമ്പിളുകള്‍ കോവിഡ് പരിശോധനക്ക് വിധേയമാക്കിയതായി ഐ.സി.എം.ആര്‍ അറിയിച്ചു. രാജ്യത്ത് ഇതുവരെ 2.76 കോടി കോവിഡ് പരിശോധനകളാണ് നടത്തിയിട്ടുള്ളതെന്നും ഐ.സി.എം.ആര്‍ അറിയിച്ചു.
