കണ്ടെയ്ന്മെന്റ് സോണുകളില് മുഴുവന് പേര്ക്കും ആന്റിജന് പരിശോധന നടത്തണം: ഐസിഎംആര്
സിന്ധുമോള് ആര്
കൊവിഡ് കണ്ടെയ്ന്മെന്റ് സോണായി പ്രഖ്യാപിക്കുന്ന മേഖലകളില് മുഴുവന് പേരിലും ആന്റിജന് പരിശോധന നടത്തണമെന്ന് ഐസിഎംആര്. പുതിയ മാര്ഗനിര്ദേശത്തിലാണ് ഐസിഎംആര് ഇക്കാര്യം നിര്ദേശിച്ചിരിക്കുന്നത്. കോവിഡ് വ്യാപനം രൂക്ഷമായ പ്രദേശങ്ങളിലെ കണ്ടെയ്ന്മെന്റ് സോണുകളിലുള്ള എല്ലാവര്ക്കും ദ്രുത ആന്റിജന് പരിശോധന നടത്തണമെന്നാണ് നിര്ദേശം.
എന്നാല് സംസ്ഥാനങ്ങള്ക്ക് അവരുടെ വിവേചനാധികാരം ഉപയോഗിച്ച് ഈ നിര്ദേശത്തില് മാറ്റംവരുത്താമെന്നും ഐസിഎംആര് പറയുന്നു. ആന്റിജന് പരിശോധനയില് നെഗറ്റീവായ ആള് രോഗലക്ഷണങ്ങള് പ്രകടിപ്പിച്ചാല് ആര്ടി-പിസിആര് പരിശോധന നടത്തണം. വൈറസ് സാന്നിധ്യവും വ്യാപനവും മാസങ്ങള് കഴിഞ്ഞിട്ടും പിടിച്ചു നിര്ത്താന് സാധിക്കാതെ വന്നതോടെയാണ് കണ്ടെയ്ന്മെന്റ് സോണുകള് കേന്ദ്രീകരിച്ച് സമ്പൂര്ണ പരിശോധന നടത്താന് നിര്ദേശം നല്കിയിരിക്കുന്നത്. കണ്ടെയ്ന്മെന്റ് സോണുകളില് താമസിക്കുന്ന 100 ശതമാനം ആളുകളെയും റാപ്പിഡ് ആന്റിജന് പരിശോധനയ്ക്കു വിധേയമാക്കണം, പ്രത്യേകിച്ചും അണുബാധ പടരുന്ന നഗരങ്ങളില് ഇത് അതാത് സംസ്ഥാനങ്ങള് ഏറ്റെടുത്ത് ചെയ്യണമെന്നാണ് ഐസിഎംആര് പറയുന്നത്.