ലോകത്ത് കോവിഡ് ബാധിതരുടെ എണ്ണം മൂന്ന് കോടിയിലേക്ക്
സിന്ധുമോള് ആര്
ലോകത്ത് കോവിഡ് ബാധിതരുടെ എണ്ണം മൂന്ന് കോടിയിലേക്ക് കുതിക്കുന്നു. 29,415,168 പേര്ക്ക് ഇതുവരെ കോവിഡ് ബാധിച്ചെന്നാണ് ജോണ്സ് ഹോപ്കിന്സ് സര്വകലാശാലയും വേള്ഡോ മീറ്ററും പുറത്ത് വിടുന്ന കണക്കുകള്. 931,934 പേര്ക്ക് ജീവന് നഷ്ടമായെന്നും 21,260,789 പേര് രോഗമുക്തി നേടിയെന്നും കണക്കുകള് വ്യക്തമാക്കുന്നു. അമേരിക്കയില് കോവിഡ് ബാധിതരുടെ എണ്ണത്തിലും വൈറസ് ബാധിച്ച് മരിക്കുന്നവരുടെ എണ്ണത്തിലുള്ള വര്ദ്ധനയ്ക്ക് ശമനമില്ല. രാജ്യത്ത് ഇതുവരെ 6,746,284 പേര്ക്കാണ് കോവിഡ് ബാധിച്ചത്. മരണ സംഖ്യ രണ്ടു ലക്ഷത്തിലേക്ക് കുതിക്കുകയാണ്. 198,920 പേര്ക്കാണ് ഇതുവരെ കോവിഡ് ബാധിച്ച് ജീവന് നഷ്ടപ്പെട്ടത്. 4,021,003 പേര് രോഗമുക്തി നേടുകയും ചെയ്തു.കലിഫോര്ണിയ, ടെക്സസ്, ഫ്ളോറിഡ, ന്യൂയോര്ക്ക്, ജോര്ജിയ, ഇല്ലിനോയിസ്, അരിസോണ, ന്യൂജഴ്സി, നോര്ത്ത് കരോലിന, ടെന്നിസി എന്നീ 10 സംസ്ഥാനങ്ങളിലാണ് കോവിഡ് പിടിമുറുക്കിയിട്ടുള്ളത്.
ഇന്ത്യയിലെ കോവിഡ് ബാധിതരുടെ എണ്ണം കുതിക്കുന്നു. രാജ്യത്ത് 48,46,428 പേര്ക്കാണ് ഇതുവരെ വൈറസ് ബാധിച്ചത്. കഴിഞ്ഞ 24 മണിക്കൂറിനിടെ രാജ്യത്ത് 92,071 പേര്ക്കാണ് കോവിഡ് പോസിറ്റീവായത്.1,136 പേരാണ് ഒറ്റദിവസം കോവിഡ് ബാധിച്ച് മരിച്ചത്. ഇതോടെ രാജ്യത്ത് 79,722 പേര് കോവിഡ് മൂലം മരണത്തിന് കീഴടങ്ങുകയും ചെയ്തു. 37,80,108 പേര് രോഗമുക്തി നേടി. 9,86,598 പേര് വിവിധ സംസ്ഥാനങ്ങളിലായി ഇപ്പോഴും ചികിത്സയിലാണ്.