മുംബൈ കെട്ടിടം ദുരന്തം: മരണം 33 ആയി ഉയര്ന്നു
സിന്ധുമോള് ആര്
മുംബൈ: മഹാരാഷ്ട്ര ഭീവണ്ടിയില് കനത്തമഴയില് ബഹുനില കെട്ടിടം തകര്ന്നുണ്ടായ അപകടത്തില് മരണസംഖ്യ 33 ആയി ഉയര്ന്നു. ദേശീയ ദുരന്ത നിവാരണ സേനയാണ് പുതിയ കണക്ക് പുറത്തുവിട്ടത്. 13 പേരുടെ മൃതദേഹങ്ങള് കൂടി ചൊവ്വാഴ്ച കണ്ടെടുത്തു.
അതേസമയം, കെട്ടിടത്തിനുള്ളില് കുടങ്ങിയവര്ക്കായി മൂന്നാം ദിവസവും എന്.ഡി.ആര്.എഫ് സംഘത്തിന്റെ നേതൃത്വത്തില് തെരച്ചില് പുരോഗമിക്കുകയാണ്. തിങ്കളാഴ്ച എട്ട് കുട്ടികള് ഉള്പ്പെടെ 11 പേരുടെ മരണം സ്ഥിരീകരിച്ചിരുന്നു. തിങ്കളാഴ്ച പുലര്ച്ചയാണ് കനത്തമഴയെ തുടര്ന്ന് 40 വര്ഷം പഴക്കമുള്ള മൂന്നുനില കെട്ടിടം നിലംപൊത്തുകയായിരുന്നു. ഭീവണ്ടി, നര്പോളി പട്ടേല് കോമ്പൌണ്ടിലെ ഗിലാനി ബില്ഡിങ് ആണ് തകര്ന്നു വീണത്.
കെട്ടിടത്തില് 25 കുടുംബങ്ങള് താമസിച്ചിരുന്നു. താമസക്കാര് ഉറങ്ങുന്നതിനിടെയാണ് ദുരന്തം സംഭവിച്ചത്. ഏഴു വയസ്സുകാരരന് ഉള്പ്പെടെ മുപ്പതോളം പേരെ രക്ഷപ്പെടുത്തി. കെട്ടിടം തകര്ന്ന അവസ്ഥയിലായിരുന്നുവെന്നും താമസക്കാരോട് ഒഴിഞ്ഞുപോകാന് ആവശ്യപ്പെട്ട് നോട്ടീസ് പതിച്ചിരുന്നതായും താനെ മുന്സിപ്പല് കോര്പറേഷന് വ്യക്തമാക്കുന്നു. എന്നാല്, കൃത്യവിലോപത്തിന് രണ്ട് ഉദ്യോഗസ്ഥരെ ജോലിയില് നിന്ന് സസ്പെന്ഡ് ചെയ്തിട്ടുണ്ട്.