യുവാവിന്റെ കൈയ്യിലും കാലിലും ആണി അടിച്ചുകയറ്റി, പരാതിയുമായി അമ്മ

ലഖ്‌നൗ: മാസ്‌ക് ധരിച്ചില്ലെന്ന് ആരോപിച്ച്‌ പോലീസ് കസ്റ്റഡിയിലെടുത്ത യുവാവിന്റെ കൈയ്യിലും കാലിലും ആണി അടിച്ചുകയറ്റി. പോലീസിനെതിരെ പരാതിയുമായി യുവാവിന്റെ അമ്മ എസ്പിയെ കണ്ടു. ഉത്തര്‍ പ്രദേശിലെ ബറേലി ജില്ലയിലാണ് സംഭവം. രഞ്ജിത് എന്ന യുവാവിനാണ് ക്രൂര മര്‍ദ്ദനമേറ്റത്. ബരദാരിയിലെ ചെക്ക് പോസ്റ്റിനടുത്ത് വച്ചാണ് പോലീസുകാര്‍ തന്നെ തടഞ്ഞതെന്ന് രഞ്ജിത് പറയുന്നു. ഈ വേളയില്‍ മാസ്‌ക് ധരിച്ചിരുന്നില്ല. കസ്റ്റഡിയിലെടുത്ത പോലീസ് ക്രൂരമായി മര്‍ദ്ദിക്കുകയും ആണി അടിച്ചുകയറ്റുകയുമായിരുന്നു. ബറേലിയിലെ ജില്ലാ ആശുപത്രിയില്‍ ചികില്‍സ തേടിയെന്നും രഞ്ജിതും അമ്മ ഷീല ദേവിയും പറയുന്നു.
രഞ്ജിത് പറയുന്നത് ഇങ്ങനെയാണ്- തന്റെ കൈയ്യില്‍ മാസ്‌ക് ഉണ്ടായിരുന്നു. പോലീസ് പിടിക്കുന്ന വേളയില്‍ ധരിച്ചിരുന്നില്ല. എന്നാല്‍ മാസ്‌ക് ചോദിച്ച്‌ പോലീസ് മര്‍ദ്ദിക്കുകയും അശ്ലീലം പറയുകയും ചെയ്തു. കണ്ണ് കെട്ടി മറ്റൊരു സ്ഥലത്തേക്ക് കൊണ്ടുപോയി. ശേഷമാണ് ആണി അടിച്ചുകയറ്റിയത് എന്നും രഞ്ജിത് പറയുന്നു. കൊറോണ മാനദണ്ഡങ്ങള്‍ പാലിക്കുന്നില്ല എന്നാരോപിച്ച്‌ ജനങ്ങള്‍ക്കെതിരെ പോലീസ് വ്യാപകമായി അതിക്രമം നടത്തുന്നു എന്ന പരാതി യുപിയിലെ വിവിധ ജില്ലകളില്‍ നിന്ന് ഉയര്‍ന്നിട്ടുണ്ട്.