![“Manju”](https://santhigirinews.org/wp-content/uploads/2020/04/YOUTUBE.jpg")
ലഖ്നോ: ഉത്തര്‍പ്രദേശില്‍ രാജ്യത്തെ ഏറ്റവും വലിയ അതിവേഗപാതകളിലൊന്നായി ഗംഗ എക്സ്പ്രസ്വേയുടെ സിംഹഭാഗത്തിന്റെയും നിര്‍മ്മാണം അദാനി ഗ്രൂപ്പ് ഏറ്റെടുക്കും. ഇതിനുള്ള ധാരണപത്രം യുപി എക്സ്പ്രസ്വേ ഇന്‍ഡസ്ട്രിയല്‍ ഡെവലപ്മെന്റ് അതോറിറ്റി അദാനി ഗ്രൂപ്പിന് നല്‍കി.
594 കിലോ മീറ്റര്‍ നീളത്തിലാണ് എക്സ്പ്രസ്വേ ഒരുങ്ങുന്നത്. ഇതില്‍ ബുദാന്‍ മുതല്‍ പ്രയാഗ്രാജ് വരെയുള്ള 464 കിലോ മീറ്റര്‍ ദൂരമാണ് അദാനി ഗ്രൂപ്പ് നിര്‍മ്മിക്കുക. ആകെ എക്സ്പ്രസ്വേയുടെ 80 ശതമാനവും നിര്‍മ്മിക്കുക അദാനി ഗ്രൂപ്പായിരിക്കും .
ആറ് വരി എക്സ്പ്രസ്വേക്ക് മൂന്ന് ഘട്ടങ്ങളാണുള്ളത്. ബുദാനില്‍ നിന്ന് ഹാര്‍ദോയ് വരെയുള്ള 151 കിലോ മീറ്റര്‍, ഹാര്‍ദോയ് മുതല്‍ ഉന്നാവ് വരെ 155.7 കിലോ മീറ്റര്‍, ഉന്നാവ് മുതല്‍ പ്രയാഗ്രാജ് വരെയുള്ള 159 കിലോ മീറ്റര്‍ എന്നിങ്ങനെയാണ് എക്സ്പ്രസ്വേയിലെ വിവിധ മേഖലകള്‍.
പ്രധാനമന്ത്രി നരേന്ദ്ര മോദിയാണ് എകസ്പ്രസ്വേക്ക് തറക്കല്ലിട്ടത്. മീററ്റ്, ഷാജഹാന്‍പുര്‍, റായ്ബറേലി, ബുലന്ദ്ശഹര്‍, ഹാപുര്‍, അമോറ, ബുദാന്‍, സാംഭല്‍, ഹാര്‍ദോയ്, ഉന്നാവ് പ്രതാപ്ഗ്രാഹ്, പ്രയാഗ്രാജ് എന്നീ സ്ഥലങ്ങളിലൂടെയാവും എക്സ്പ്രസ്വേ കടന്നു പോകുക.
