കണ്ണൂര്: ഡിജിപി ലോക്നാഥ് ബെഹ്റയ്ക്ക് പകരം സംസ്ഥാന പോലീസ് മേധാവിയായി ഡിജിപി ടോമിന് ജെ. തച്ചങ്കരിയെ നിയമിച്ചേക്കും. കേരള ഫിനാന്ഷ്യല് കോര്പറേഷന് സിഎംഡിയാണ് തച്ചങ്കരിയിപ്പോള്. ഇതുവരെ വഹിച്ച ചുമതലകളിലെല്ലാം വിപ്ലവകരമായ മാറ്റങ്ങള് കൊണ്ടു വന്ന തച്ചങ്കരിക്കു പോലീസ് ചീഫിന്റെ പദവിയിലെത്തുന്നതനു തടസമായി നിന്ന കേസുകള് ഉള്പ്പെടെയുള്ള കുരുക്കുകള് ഒരോന്നും ഇതിനകം ഒഴിവായിട്ടുണ്ട്. വിജിലന്സ് ഡയറക്ടര് സുധേഷ്കുമാര്, പ്രധാനമന്ത്രിയുടെ സുരക്ഷാ ചുമതലയുള്ള എസ്പിജി ഡയറക്ടര് അരുണ്കുമാര് സിന്ഹ എന്നിവരാണ് പോലീസ് ചീഫ് പദവിയിലേക്കു പരിഗണിക്കണിക്കപ്പെടുന്ന മറ്റ് രണ്ടു പേര്.
കെഎസ്എഫ്ഇയിലെ വിവാദ റെയ്ഡും മകള് പോലീസുകാരനെ കൈയേറ്റം ചെയ്ത വിവാദ കേസും സുധേഷ് കുമാറിനു പോലീസ് ചീഫ് പദവിയിലെത്തുന്നതിനു തടസമാണെന്ന് ഉന്നത വൃത്തങ്ങള് സൂചന നല്കുന്നു. കെഎസ്എഫ്ഇയുടെ വിജിലന്സ് റെയ്ഡിനെ മുഖ്യമന്ത്രി ന്യായീകരിച്ചെങ്കിലും തെരഞ്ഞെടുപ്പ് സമയത്തു രാഷ്ട്രീയ സാഹചര്യം നോക്കി മുന്നോട്ടുപോകാന് വിജിലന്സിനു സാധിച്ചില്ലെന്ന ഉന്നത നേതൃത്വത്തിന്റെ വിലയിരുത്തലും സുധേഷ് കുമാറിനു വിനയായതായാണ് അറിയുന്നത്.