അതിതീവ്ര വൈറസ്: വിമാനത്താവളങ്ങളിലും തുറമുഖങ്ങളിലും കര്ശന നിരീക്ഷണം
തിരുവനന്തപുരം: ജനിതക വ്യതിയാനം സംഭവിച്ച അതിതീവ്ര കൊറോണ വൈറസ് കേരളത്തിലും കണ്ടെത്തിയ സാഹചര്യത്തില് ആരോഗ്യ വകുപ്പ് അതീവ ജാഗ്രതാ നിര്ദേശം നല്കി. തുറമുഖങ്ങളിലും വിമാനത്താവളങ്ങളിലും നിരീക്ഷണം കര്ശനമാക്കും. വിദേശ രാജ്യങ്ങളില് നിന്നെത്തുന്നവരില് പിസിആര് പരിശോധന നടത്തും. നിയന്ത്രണങ്ങളില് ഇളവുവന്നെങ്കിലും മാസ്ക്, സാമൂഹിക അകലം, കൈകള് ശുചിയാക്കല് എന്നിങ്ങനെയുള്ള പ്രതിരോധം തുടരാനാണ് നിര്ദേശം.
യുകെയില്നിന്നു വന്ന ആറുപേരിലാണ് ജനിതക വ്യതിയാനം സംഭവിച്ച അതിതീവ്ര കൊറോണ വൈറസ് ബാധ സ്ഥിരീകരിച്ചത്. കോഴിക്കോട്, ആലപ്പുഴ ജില്ലകളില് രണ്ടു പേര്ക്കു വീതവും കോട്ടയം, കണ്ണൂര് ജില്ലകളില് ഓരോരുത്തര്ക്കുമാണ് വൈറസ് ബാധ. പൂന വൈറോളജി ഇന്സ്റ്റിറ്റ്യൂട്ടില് നിന്നുള്ള പരിശോധനാഫലത്തിലാണ് ജനിതകമാറ്റം സംഭവിച്ച വൈറസ് ബാധയാണ് ഇവര്ക്കെന്നു വ്യക്തമായത്. ഡിസംബര് 14 നു ശേഷം യുകെയില് നിന്ന് എത്തിയവരാണിവര്.
വൈറസ് ബാധിതരായ ഈ ആറുപേരും ആശുപത്രികളില് പ്രത്യേക നിരീക്ഷണത്തിലാണ്. 26 പേരുടെ സാന്പിളുകള് പരിശോധിച്ചതിലാണ് ആറുപേര്ക്ക് ജനിതമാറ്റം വന്ന വൈറസ് ബാധിച്ചതായി സ്ഥിരീകരിച്ചത്. ഇവരുടെ സന്പര്ക്കപ്പട്ടിക കുറവാണെങ്കിലും സന്പര്ക്ക സാധ്യതയുള്ളവരെയും നിരീക്ഷിച്ചുവരികയാണ്.
ഈ വൈറസ് വ്യാപനം അതിവേഗത്തിലാണ്. മറ്റുള്ളവരിലേക്ക് പകരാനുള്ള സാധ്യതയും കൂടുതലാണ്. ഭയപ്പെടേണ്ടെങ്കിലും ഈ സാഹചര്യത്തില് ജനങ്ങള് അതീവ ജാഗ്രത പുലര്ത്തണം. മാസ്കും സാനിറ്റൈസറും കര്ശനമായി ഉപയോഗിക്കണമെന്നും ആരോഗ്യമന്ത്രി നിര്ദേശിച്ചു. വിദേശത്തുനിന്നു വരുന്നവരില് ലക്ഷണങ്ങള് ഉണ്ടെങ്കില് സര്ക്കാരിനെ അറിയിക്കണമെന്നും വൈറസ് ബാധ റിപ്പോര്ട്ട് ചെയ്തിട്ടുള്ള ജില്ലകളില് അതീവജാഗ്രതാനിര്ദേശം നല്കിയതായും മന്ത്രി അറിയിച്ചു.