![“Manju”](https://santhigirinews.org/wp-content/uploads/2020/04/YOUTUBE.jpg")
സിന്ധുമോള്‍ ആര്‍
പന്തളം: മില്‍മയുടെ രൂപസാദൃശ്യത്തോടെ കവര്‍ പാലുകള്‍ വിപണിയില്‍ എത്തുന്നത് ഉപഭോക്താക്കളെ തെറ്റിദ്ധരിപ്പിക്കുന്നു. ഒറ്റനോട്ടത്തില്‍ മില്‍മയുടെ പാലും തൈരും ആണെന്ന് തെറ്റിദ്ധരിപ്പിക്കുന്ന തരത്തിലുള്ള കവറുകളിലാണ് വിപണിയിലുള്ളത്. പന്തളത്തിന് സമീപം ഐരാണിക്കുടിയില്‍ രജിസ്റ്റര്‍ ചെയ്ത ഡയറിയുടെ പേരിലാണ് ഇത്തരത്തില്‍ ഒരു കവര്‍പാല്‍ ഇറങ്ങുന്നത്. മറ്റൊന്ന് തിരുവനന്തപുരം ആസ്ഥാനമായ ഡയറിയില്‍നിന്നാണ്.
ഐരാണിക്കുടിയില്‍ രജിസ്റ്റര്‍ ചെയ്ത ഡയറിയുടെ പാല്‍ ഉല്‍പന്നങ്ങള്‍ നൂറുശതമാനവും മില്‍മക്ക് സമാനമാണ്. പല കച്ചവടക്കാരും മില്‍മയുടെ പാലും രൂപസാദൃശ്യമുള്ള മറ്റ് പാലും ഇടകലര്‍ത്തിയാണ് വില്‍ക്കുന്നത്‌. മില്‍മ അരലിറ്ററിന്റെ കവര്‍പാലാണ് വിപണിയിലെത്തിക്കുന്നത്. എന്നാല്‍, വ്യാജന്റെ അളവ് 450 മില്ലിലിറ്റര്‍ ആണ്. മില്‍മയുടെ കച്ചവടക്കാരെ തിരഞ്ഞുപിടിച്ചാണ് അപരന്റെ കച്ചവടം. മില്‍മ നല്‍കുന്ന കമീഷനെക്കാള്‍ മൂന്നുരൂപ അധികമാണ് കമീഷന്‍.
ഐരാണിക്കുടിയില്‍നിന്ന് കിലോമീറ്ററുകള്‍ അകലെ പ്രവര്‍ത്തിച്ചിരുന്ന ഒരു ഡയറിയുടെ പാല്‍ വ്യാപകമായി ഈയിടെ കേടായിരുന്നു. ഇതോടെ ഇവര്‍ പേരുമാറ്റിയാണ് പുതിയ പാല്‍ വിപണിയില്‍ ഇറക്കിയതെന്ന് പറയുന്നു. രൂപസാദൃശ്യമുള്ള രണ്ട് കമ്പനികളുടെ ഉല്‍പന്നങ്ങള്‍ വിപണിയില്‍ ലഭ്യമാണെന്ന വിവരം ലഭിച്ചതായി മില്‍മ അധികൃതര്‍ പറയുന്നു. രണ്ട് കമ്പനികള്‍ക്കും നോട്ടീസ് നല്‍കിയെങ്കിലും തിരുവനന്തപുരം ആസ്ഥാനമായ കമ്പനി മാത്രമാണ് വിശദീകരണം നല്‍കിയത്. ഐരാണിക്കുടി ആസ്ഥാനമായ വിതരണക്കാര്‍ മറുപടിനല്‍കാന്‍ തയാറായില്ലെന്നും, കോടതിയെ സമീപിക്കുമെന്നും മില്‍മ അധികൃതര്‍ വെളിപ്പെടുത്തി.
