ശ്രീജ.എസ്
ചെന്നൈയില് നടക്കാനിരിക്കുന്ന ഐപിഎല് താരലേലത്തിന്റെ ചുരുക്കപ്പട്ടിക പ്രഖ്യാപിച്ച് ബിസിസിഐ. മൊത്തം 1114 താരങ്ങള് ലേലത്തിനായി രജിസ്റ്റര് ചെയ്തിരുന്നുവെങ്കിലും ഇതില് നിന്ന് 292 താരങ്ങളാണ് ലേലത്തിനുള്ള അന്തിമ പട്ടികയില് ഇടം പിടിച്ചത്. 8 ഐപിഎല് ഫ്രാഞ്ചൈസികളും നല്കിയ ഷോര്ട്ട് ലിസ്റ്റ് പരിഗണിച്ചാണ് ലേലത്തിനുള്ള അന്തിമ പട്ടിക ബിസിസിഐ തീരുമാനിച്ചിരിക്കുന്നത്.
ലേലത്തിലെ ഏറ്റവുമുയര്ന്ന അടിസ്ഥാന വില 2 കോടി രൂപയാണ്. രണ്ട് ഇന്ത്യന് താരങ്ങളുള്പ്പെടെ മൊത്തം 10 പേരാണ് ഈ ലിസ്റ്റിലുള്ളത്. ഹര്ഭജന് സിംഗ്, കേദാര് ജാദവ് എന്നിവരാണ് 2 കോടി രൂപ അടിസ്ഥാന വിലയുള്ള ഇന്ത്യന് കളികാര്. ഇവരെക്കൂടാതെ ഗ്ലെന് മാക്സ്വെല്, സ്റ്റീവ് സ്മിത്ത്, ഷക്കീബ് അല് ഹസന്, മോയിന് അലി, സാം ബില്ലിംഗ്സ്, ലിയാം പ്ലങ്കറ്റ്, ജേസണ് റോയ്, മാര്ക്ക് വുഡ് എന്നീ വിദേശ കളികാര്ക്കും 2 കോടി രൂപയാണ് ലേലത്തിലെ അടിസ്ഥാന വില.
12 കളികാര്ക്കാണ് ലേലത്തില് ഒന്നരക്കോടി രൂപ അടിസ്ഥാന വിലയുള്ളത്. ഉമേഷ് യാദവ്, ഹനുമ വിഹാരി എന്നിവരുള്പ്പെടെയുള്ള 11 കളികാര്ക്ക് 1 കോടി രൂപയാണ് അടിസ്ഥാന വില. 164 ഇന്ത്യന് താരങ്ങളും, 125 വിദേശ താരങ്ങളും, അസോസിയേറ്റ് രാജ്യങ്ങളില് നിന്നുള്ള 3 താരങ്ങളുമുള്പ്പെടെ മൊത്തം 292 പേരാണ് ലേലപ്പട്ടികയിലുള്ളത്.
8 ഫ്രാഞ്ചൈസികളിലുമായി ആകെ 61 ഒഴിവുകളാണ് നിലവിലുള്ളത്. 18-ംതീയതി വൈകിട്ട് 3 മണിക്ക് ആരംഭിക്കുന്ന ലേലം സ്റ്റാര് സ്പോര്ട്സ് തത്സമയം സംപ്രേക്ഷണം ചെയ്യും.