പുതുച്ചേരി: വി. നാരായണ സ്വാമിയുടെ നേതൃത്വത്തിലുണ്ടായിരുന്നു കോണ്ഗ്രസ് മുന്നണി സര്ക്കാറിനെ കുതിരക്കച്ചവടത്തിലൂടെ അധികാരത്തില് നിന്ന് ഇറക്കിയിട്ടും പുതുച്ചേരിയില് സര്ക്കാര് രൂപീകരണത്തിന് ശ്രമിക്കാതെ ബി.ജെ.പിയും സഖ്യകക്ഷികളും. ബി.ജെ.പി സര്ക്കാര് രൂപീകരണത്തിന് അവകാശവാദം ഉന്നയിക്കില്ലെന്ന് ബന്ധപ്പെട്ട വൃത്തങ്ങള് വ്യക്തമാക്കിയതായി എന്.ഡി.ടി.വി റിപ്പോര്ട്ട് ചെയ്തു. ലെഫ്റ്റനന്റ് ഗവര്ണര് രാഷ്ട്രപതി ഭരണത്തിന് ശിപാര്ശ ചെയ്തതായും റിപ്പോര്ട്ടില് പറയുന്നു.
രാഷ്ട്രപതി ഭരണത്തിനുള്ള ലെഫ്റ്റനന്റ് ഗവര്ണറുടെ കത്തില് കേന്ദ്ര മന്ത്രിസഭ ഇന്ന് തീരുമാനമെടുക്കുമെന്നാണ് കരുതുന്നത്. നിയമസഭ തെരഞ്ഞെടുപ്പിന് മാസങ്ങള് മാത്രം ശേഷിക്കെ, രാഷ്ട്രപതി ഭരണം ഏര്പ്പെടുത്തി തെരഞ്ഞെടുപ്പിനെ നേരിടാനാണ് ബി.ജെ.പി തീരുമാനം. കോണ്ഗ്രസ് സര്ക്കാറിനെ അട്ടിമറിച്ച് ഭരണത്തിലേറുന്നത് തെരഞ്ഞെടുപ്പില് തിരിച്ചടിയായേക്കുമെന്നാണ് ഇവരുടെ വിലയിരുത്തല്.
തിങ്കളാഴ്ചയാണ് നാരായണസ്വാമി സര്ക്കാറിന് സഭയില് ഭൂരിപക്ഷം നഷ്ടമായത്. അഞ്ച് കോണ്ഗ്രസ് എം.എല്.എമാരും ഒരു ഡി.എം.കെ എം.എല്.എയും രാജിവെച്ചതോടെയാണ് സര്ക്കാറിന് ഭൂരിപക്ഷം നഷ്ടമായത്. ഇവരില് രണ്ട് പേര് ബി.ജെ.പിയില് ചേര്ന്നുകഴിഞ്ഞു. മറ്റുള്ളവരും ബി.ജെ.പിയിലെത്തുമെന്നാണ് പ്രതീക്ഷിക്കുന്നത്.
രാഷ്ട്രപതിഭരണം ആറു മാസക്കാലംവരെ നീട്ടിക്കൊണ്ടുപോയി തെരഞ്ഞെടുപ്പ് നടത്താനാണ് ബി.ജെ.പി ഉന്നത കേന്ദ്രങ്ങളുടെ നീക്കം. രാഷ്ട്രപതിഭരണകാലയളവില് കൂടുതല് ക്ഷേമപദ്ധതികള് നടപ്പാക്കി ജനങ്ങളുടെ വിശ്വാസമാര്ജിക്കുകയാണ് ലക്ഷ്യം. ഉടനടി നിയമസഭ തെരഞ്ഞെടുപ്പ് നടത്തിയാല് കോണ്ഗ്രസ്-ഡി.എം.കെ മുന്നണി സഹതാപതരംഗത്തിലൂടെ നേട്ടമുണ്ടാക്കിയേക്കുമെന്നും ബി.ജെ.പി കേന്ദ്രങ്ങള്ക്ക് ആശങ്കയുണ്ട്.