ശ്രീജ.എസ്
ന്യൂഡല്ഹി: ‘താണ്ഡവ്’ വെബ്സീരീസുമായി ബന്ധപ്പെട്ട് ആമസോണ് പ്രൈം മേധാവി അപര്ണ പുരോഹിതിന്റെ അറസ്റ്റ് തടഞ്ഞ് സുപ്രീംകോടതി. ഒപ്പം കേസില് അന്വേഷണവുമായി സഹകരിക്കണമെന്ന് അപര്ണക്ക് നിര്ദേശം നല്കി.
അറസ്റ്റ് തടയണമെന്നാവശ്യപ്പെട്ട് അലഹബാദ് ഹൈകോടതിയില് സമര്പ്പിച്ച മുന്കൂര് ജാമ്യാപേക്ഷ തള്ളിയതിനെ തുടര്ന്നാണ് അപര്ണ പുരോഹിത് സുപ്രീംകോടതിയെ സമീപിച്ചത്. ‘താണ്ഡവ്’ വെബ്സീരീസിലൂടെ ഹൈന്ദവ ദൈവങ്ങളെ അപമാനിച്ചെന്നാണ് ആമസോണ് മേധാവിക്കെതിരായ പരാതി.
രാജ്യത്തെ ഒ.ടി.ടി പ്ലാറ്റ്ഫോമുകള് നിയന്ത്രിക്കുന്നതിനായി കേന്ദ്രസര്ക്കാര് കൊണ്ടുവന്ന ചട്ടങ്ങള് മാര്ഗനിര്ദേശങ്ങള് മാത്രമാണെന്നും അതിലൂടെ ഡിജിറ്റല് പ്ലാറ്റ്ഫോമുകള്ക്കെതിരെ നടപടി എടുക്കാന് സാധിക്കില്ലെന്നും കോടതി നിരീക്ഷിച്ചു . ജസ്റ്റിസുമാരായ അശോക് ഭൂഷണ്, സുഭാഷ് റെഡ്ഡി തുടങ്ങിയവരാണ് ഹരജി പരിഗണിച്ചത്.