രാജ്യത്തെ 74 ശതമാനം കൊറോണ കേസുകൾ കേരളത്തിലും മഹാരാഷ്ട്രയിലും

ന്യൂഡൽഹി: ഇന്ത്യയിലെ പ്രതിദിന കൊറോണ കേസുകളിൽ 74 ശതമാനവും കേരളത്തിലും മഹാരാഷ്ട്രയിലുമാണെന്ന് കേന്ദ്ര ആരോഗ്യമന്ത്രാലയം. കഴിഞ്ഞ 24 മണിക്കൂറിനിടെ 14,199 പേർക്കാണ് രാജ്യത്ത് പുതുതായി രോഗം ബാധിച്ചത്. ഇതിൽ 6,971 പേർ മഹാരാഷ്ട്രയിലും 4,070 പേർ കേരളത്തിലുമാണ്.

കഴിഞ്ഞ 24 മണിക്കൂറിനുള്ളിൽ 6,20,216 പരിശോധനകളാണ് രാജ്യത്ത് നടത്തിയത്. ഇതോടെ ആകെ പരിശോധനകളുടെ എണ്ണം 21.15 കോടി(21,15,51,746) കവിഞ്ഞു. 1,220 സർക്കാർ ലബോറട്ടറികളും 1,173 സ്വകാര്യ ലബോറട്ടറികളും ഉൾപ്പെടെ 2,393 പരിശോധന ലബോറട്ടറികളാണ് രാജ്യത്തുള്ളത്.

രാവിലെ 8 മണി വരെയുള്ള താത്ക്കാലിക കണക്ക് പ്രകാരം 2,32,317 സെഷനുകളിലായി 1,11,16,854 ഗുണഭോക്താക്കൾ വാക്‌സിൻ സ്വീകരിച്ചു. 63,97,849 ആരോഗ്യപ്രവർത്തകർ ആദ്യ ഡോസും 9,67,852 ആരോഗ്യപ്രവർത്തകർ രണ്ടാം ഡോസും സ്വീകരിച്ചു. 37,51,153 മുന്നണിപ്പോരാളികൾ ഒന്നാം ഡോസും സ്വീകരിച്ചു കഴിഞ്ഞു.