മലാലയുമായി കൈകോര്ത്ത് ആപ്ള്
വാഷിങ്ടണ്: ഏറ്റവും പ്രായംകുറഞ്ഞ നൊബേല് പുരസ്കാര ജേതാവ് മലാല യൂസുഫ് സായിയുമായി കൈകോര്ത്ത് യു.എസ് ആസ്ഥാനമായുളള ബഹുരാഷ്ട്ര ഭീമന് ആപ്ള്’. ആപ്ള് ടി.വി പ്ലസുമായാണ് വര്ഷങ്ങള് നീളുന്ന കരാര്. നാടകം, ഹാസ്യ പരിപാടികള്, ഡോക്യുമെന്ററികള്, ആനിമേഷന്, കുട്ടികളുടെ പരമ്പരകള് തുടങ്ങി വിവിധ പരിപാടികളുടെ നിര്മാണത്തില് മലാല സഹകരിക്കും. ‘എക്സ്ട്രാകരിക്കുലാര്’ എന്ന സ്വന്തം കമ്പനിയുടെ പേരിലാകും മലാല ഇവക്കാവശ്യമായ ഉള്ളടക്കം നിര്മിക്കുക.
”ലോകത്തിന് പ്രചോദനമാകാനുള്ള അവരുടെ ശേഷി പ്രയോജനപ്പെടുത്തുകയാണ് ലക്ഷ്യ’മെന്ന് കമ്പനി വാര്ത്താ കുറിപ്പില് അറിയിച്ചു.
തീവ്രവാദി ആക്രമണത്തില് ഗുരുതര പരിക്കുകളുമായി വര്ഷങ്ങള് മല്ലിട്ട മലാല തിരിച്ചെത്തിയ ശേഷം പെണ്കുട്ടികളുടെ വിദ്യാഭ്യാസ പ്രവര്ത്തന രംഗത്ത് സജീവമാണ്. ബി.ബി.സിക്കായി സ്വന്തം പേരിലും തൂലിക നാമത്തിലും ഇവര് എഴുതിയ ലേഖനങ്ങളും േബ്ലാഗുകളും വന് ജനപ്രീതി നേടിയിരുന്നു. ആത്മകഥയും ലോകം മുഴുക്കെ ബെസ്റ്റ്സെല്ലറായി. മലാലയുടെ രചനകളോടുള്ള ജനപ്രീതി ഉപയോഗപ്പെടുത്തുകയെന്ന ലക്ഷ്യത്തോടെയാണ് ആപ്ള് കരാറിലെത്തുന്നത്.
2014ല് 17ാം വയസ്സിലാണ് മലാല നൊബേല് ജേതാവാകുന്നത്. കുട്ടികളുടെ അവകാശ സംരക്ഷണത്തിന് പ്രവര്ത്തിച്ചുവരുന്ന ഇന്ത്യക്കാരനായ കൈലാശ് സത്യാര്ഥിക്കൊപ്പമായിരുന്നു പുരസ്കാരം നേടിയത്.
.