ഉലുവ പ്രധാന ഭക്ഷണമായി ഉപയോഗിയ്ക്കില്ലെങ്കിലും ഭക്ഷണചേരുവകളില്പെട്ട ഒന്നു തന്നെയാണ്. ഉലുവ ആരോഗ്യത്തിനും സൗന്ദര്യത്തിനുമെല്ലാം ഒരേ പോലെ ഗുണകരമാണ്. ദിവസവും വെറും വയറ്റില് ഒരു ഗ്ലാസ് ഉലുവ വെള്ളം കുടിച്ചാലുള്ള ഗുണങ്ങള് ചെറുതൊന്നുമല്ല. ഇതില് ഫോളിക് ആസിഡ്, വിറ്റാമിന് എ, വിറ്റാമിന് സി എന്നിവ ധാരാളം അടങ്ങിയിരിക്കുന്നു.
ഉലുവയിട്ട് തിളപ്പിച്ച വെള്ളം കുടിക്കുന്നത് കൊളസ്ട്രോള് കുറയ്ക്കാന് സഹായിക്കുന്നു. ചീത്ത കൊളസ്ട്രോളായ എല്.ഡി.എല്. കൊളസ്ട്രോള് കുറയ്ക്കാന് മാത്രമല്ല, നല്ല കൊളസ്ട്രോളായ എച്ച്.ഡി.എല്. കൊളസ്ട്രോള് കൂട്ടാനും ഉലുവയിട്ട വെള്ളം സഹായിക്കും. ഭക്ഷണത്തിലൂടെയെത്തുന്ന വിഷാശങ്ങളെ പുറന്തള്ളാന് ഉലുവയ്ക്ക് കഴിവുണ്ട്. ഇത് നല്ല ദഹനം നല്കുകയും, മലബന്ധം ഒഴിവാക്കുകയും ചെയ്യും. അതിനാല് അസിഡിറ്റി മൂലമുണ്ടാകുന്ന നെഞ്ചെരിച്ചില് തടയാനും ഭക്ഷണത്തില് ഒരു സ്പൂണ് ഉലുവ ചേര്ക്കുന്നത് സഹായിക്കും.
രക്തത്തിലെ പഞ്ചസാരയുടെ അളവ് നിയന്ത്രിച്ച് നിര്ത്താനും ഉലുവ കുതിര്ത്ത വെള്ളം കുടിക്കുന്നത് സഹായിക്കും. ഉലുവയില് അടങ്ങിയ ഫൈബറും മറ്റ് രാസപദാര്ത്ഥങ്ങളും ദഹനപ്രക്രിയ പതിയെ ആക്കുന്നു. ഇത് ശരീരം കാര്ബോഹൈഡ്രേറ്റും പഞ്ചസാരയും വലിച്ചെടുക്കുന്ന പ്രക്രിയയും മെല്ലെയാക്കുന്നു. ശരീരം പുറപ്പെടുവിക്കുന്ന ഇന്സുലിന്റെ അളവ് വര്ധിപ്പിക്കാനും അതുവഴി പ്രമേഹം നിയന്ത്രണാധീനമാക്കാനും ഇത് സഹായകമാകും.പൊതുവായി ഉണ്ടാകുന്ന ഒരു ആരോഗ്യ പ്രശ്നമാണ് പുളിച്ച് തികട്ടല്. നെഞ്ചെരിച്ചിലും വയറിന് വേദനയുമെല്ലാം ഇതിന്റെ ഭാഗമായി ഉണ്ടാകാം. വെറും വയറ്റില് ഉലുവ കുതിര്ത്ത് വച്ച വെള്ളം കുടിക്കുന്നത് പുളിച്ച് തികട്ടലിന് ശമനമുണ്ടാക്കും.
നല്ല തിളങ്ങുന്ന ചര്മം ആഗ്രഹിക്കുന്നവര്ക്കും ഉലുവ അനുഗ്രഹമാണ്. ശരീരത്തിലെ വിഷാംശം നീക്കി ദഹനത്തെ സഹായിക്കുന്ന ഉലുവ ചര്മത്തിന്റെയും ആരോഗ്യം കാക്കുന്നു. വൈറ്റമിന് കെ, വൈറ്റമിന് സി എന്നിവ അടങ്ങിയ ഉലുവ ചര്മത്തിലെ തിണര്പ്പുകളും കറുത്ത പാടുകളും മാറാന് സഹായിക്കും. അമിതവണ്ണം കുറയ്ക്കാന് ഉലുവ വെള്ളം വളരെ നല്ലതാണ്. ഉലുവയിലെ ഫൈബര് ദഹനത്തിലും കൊഴുപ്പും പുറന്തള്ളാനുമെല്ലാം സഹായിക്കുന്നു. ഇതിലെ ലയിക്കുന്ന സ്വഭാവിക ഫൈബര് വയറ്റിലെത്തുന്നത് വിശപ്പിനെ നിയന്ത്രിക്കാന് സഹായിക്കും. ഉലുവയില് കാണപ്പെടുന്ന ഗാലക്റ്റോമന്നന് എന്ന ഘടകമാണ് ഭാരം കുറയ്ക്കാന് സഹായിക്കുന്നത്. ഗാലക്റ്റോമന്നന് ശരീരത്തിലെ മെറ്റബോളിസം വര്ധിപ്പിക്കുകയും അമിത കൊഴുപ്പ് കുറയ്ക്കുകയും ചെയ്യുന്നു.