അമൃത്സര്: പ്രശസ്ത പഞ്ചാബി ഗായകന് ദില്ജാന് (31) കാറപകടത്തില് മരിച്ചു. ചൊവ്വാഴ്ച രാവിലെ അമൃത്സറിന് സമീപം ജന്ഡിയാല ഗുരുവില് വച്ചാണ് അപകടമുണ്ടായത്. കര്തര്പൂരിലേക്കുള്ള വഴി മദ്ധ്യേ ദില്ജാന് സഞ്ചരിച്ച കാര് റോഡരുകില് നിര്ത്തിയിട്ട ട്രക്കില് ഇടിച്ച് തകര്ന്നു. ഉടനെ തന്നെ അദ്ദേഹത്തെ അടുത്തുള്ള സ്വകാര്യ ആശുപത്രിയില് പ്രവേശിപ്പിച്ചെങ്കിലും ജീവന് നഷ്ടപ്പെട്ടിരുന്നു.
കര്തര്പൂര് സ്വദേശിയായ ദില്ജാന് പഞ്ചാബിലെ യുവ ഗായകരില് തിളങ്ങി നിന്നിരുന്നു. 2012-ല് ടെലിവിഷന് റിയാലിറ്റി ആയ സുര് ക്ഷേത്രയിലെ വിജയിയായിരുന്നു. ഇന്ത്യ-പാക് ഗായകര് പങ്കെടുത്ത മത്സരമായിരുന്നു ഇത്. റിയാലിറ്റി ഷോയിലൂടെ ശ്രദ്ധിക്കപ്പെട്ട ദില്ജാന് നിരവധി പഞ്ചാബി സിനിമകള്ക്ക് വേണ്ടിയും പാടിയിട്ടുണ്ട്. ഭാര്യയും മകളും കാനഡയിലാണ്.